Global Money Week Aruba a clausura su prome actividad digital exitosamente

149

Despues di a organisa e evento anual aki pa dos anja consecutivo na San Nicolas, e anja aki pa motibo di COVID-19 Global Money Week Aruba (GMWA) a tene e actividad aki den un forma digital durante e periodo di vakantie grandi di scol. E actividad aki ta dirigi na
educacion financiero pa nos muchanan usando e modelo di circulo financiero cu ta cubri 7 tema, esta discubri, siña, innova, gana, gasta, spaar y comparti.

Durante 7 siman, e muchanan a participa na un forma interactivo y creativo, explorando entre otro temanan riba e rol di placa y con pa spaar y inverti. Atraves di social media posts relata na cada tema, muchanan a siña tocante diferente aspectonan di placa y tambe a gana premio pa ‘back to school’. Nan a explora e diferente biyete nobo di florin y e diferente elemento di siguridad via un app digital. Nan a siña tocante nos moneda y con pa usa nos moneda via un rekensom.

Tambe por a siña kiko kiermen cuminsa bo mesun negoshi y con pa genera fondo trahando un business model canvas via un workshop digital. Alabes, a enfoca riba e importancia di sa con pa uza placa na un manera responsabel y con pa spaar placa. E muchanan a siña esaki via algun tip practico. Ademas, e muchanan a haya informacion tocante innovacion financiero y e importancia di con pa duna bek na comunidad via wega y quiz digital. Por ultimo, GMWA atraves di Share Station a haci un donacion na Red Cross Aruba y Fundacion
Pa Nos Comunidad.

Mirando e importancia pa educacion y inclusion financiero, Banco Central di Aruba (BCA) na 2018 a bin cu e initiativa pa organisa anualmente e GMWA, trahando hunto cu socionan manera Gobierno di Aruba ( IDEA & FUTURA), Aruba Bank, Banco di Caribe, Caribbean Mercantile Bank, CIBC First Caribbean, RBC, Guardian Group, Qredits, Ennia, Kiwanis Club of Aruba, Camara di Comercio y Industria, Fundacion Museo Arubano, Museo Arqueologico Nacional Aruba, y Setar pa por haci e iniciativanan aki posibel. BCA atraves di GMWA kier a gradici tur e socionan pa nan aporte y colaboracion continuo pa por logra e programa educativo importante aki pa nos muchanan! Pa mas informacion riba e actividadnan di GMWA por sigui nos riba nos Facebook y Instagram
page di GMWA ‘Global Money Week Aruba’.