Drs. Glenda Hernandez a cuminsa cu su trabao awe como director interino di Arubahuis. Durante di un reunion cu tur trahado, incluyendo e dos ex-directornan den sala, Minister Plenipotenciario Guillfred Besaril a introduci Hernandez na e personal di Arubahuis. Minister Besaril a yama señora Hernandez bonbini na e team di Arubahuis y a bisa di ta hopi contento cu su nombracion como director a.i. pa reforsa e organisacion y yuda den e transicion cu Arubahuis ta pasando den dje na e momento aki.
Esaki principalmente ta encera e decision cu Arubahuis ta bay muda pa un periodo temporal na un otro localidad. Cu e mudamento aki lo cuminsa tambe cu e trabao di renobacion di e edificio di Arubahuis na R.J. Schimmelpennincklaan.
Glenda Hernandez pa hopi aña tabata director di Departamento di Asuntonan Social na Aruba y den tal funcion tabata hopi envolvi cu e Social Crisisplan. Prome cu su trabao na Departamento di Asuntonan Social, señora Hernandez a traha hopi aña na nivel di management na Hulanda.
Prome cu e introduccion na e personal a tuma lugar un traspaso di trabao entre e director anterior mr. Glenn Ling y drs. Glenda Hernandez. Remarcabel ta cu, despues di cambio di gobernacion di AVP pa MEP, a hala Shandra John un banda, cu tabata encarga cu e maneho diario di Arubahuis. El a keda traha eynan, pero no cu e funcion mas. Awendia e ta Juridisch adviseur/ Assistant EU- vertegenwoordiger.
Despues a bin Glenn Ling, cu a bula di Aruba bay establece na Hulanda y a haya e funcion di e maneho diario di Arubahuis. Tampoco a haya e funcion di director, sino director intrino “belast met de leiding”. E ta por lo menos un di e problemanan pa cual Centrale Accountants Dienst (CAD) a conduci un investigacion den e departamento y consecuentemente a bah’e di funcion. Pero, en bes di tuma medidanan disciplinario of penal, a lag’e sigui traha eyden comosifuera nad’un pasa.
Pues, na e momento aki Gobierno di Aruba ta keda cambia director interino pa otro director interino, lagando esun cu a faya keto bay den servicio cu su salario, pero den otro funcion. Directiva di ArubaHuis a pasa di un contractant pensionado, pa un otro contractant pensiona, mientras eyden mes tin profesional cu por eherce e trabou. Na final ta fiesta tin eyden di salario di director interino. E tipo di maneho asina no ta cuadra cu henter e plan di baha gasto di personal di Gobierno.
