E trahadonan cada biaha cu tin problema, nan ta haya opdracht pa bay Medwork, pa meld nan mes ziek. Pa esey mester registra un caminda.
Di un otro banda, segun Gina Maduro, presidente di ABV, e trahado no ta malo, ta ora cu e yega na su luga di trabao, ta haci’e malo, cu ta haci cu cada biaha tin cu bay Medwork pa registra. Esey ta pone cu su record di ziektemelding ta subi door di e situacion aki, pasobra e no ta malo di su salud. Pero ta door di e situacion, e luga ta pon’e bira malo.
Cualkier hende no por wanta un holo di diesel of di tur e situacion aki cu tin cu traha aden. Corda pashentnan cu tin cu bin tuma servicio. Esey ta pasando structural.
Contribucion di ABV
Maduro a splica cu di parti di ABV, no ta su trabao di pusha e garoshi. Pero ta pidi reunion cu minister y sinta cu tur e stakeholdernan pa wak con por yega na un solucion na esaki.
Na final di dia, ta e trahadonan ta e dupe. No ta ni SOGA ta sinta eynan, cu ta nan ta pasa den e cosnan aki. Ta e trahado y pashentnan ta sufri. Tur actividad ta wordo para, stroba, tempo di espera largo.
Mester keda duna servicio. Henter aña ABV a para pafo cu delaster un departamento di hospital. No por sigui asina, Maduro a splica.
Hunta di supervision
Pa hopi tempo ABV no tin un contacto directo cu e hunta di supervision di hospital. No sa si nan ta lanta of drumi, pero a yega tempo pa nan move. Ta nan ta Raad van Toezicht y nan mester para pa hospital.
CAO
Nunca hospital no tin placa, pasobra AZV ta subsidia cuido medico. Maduro a splica cu for di Maart nan ta mesa pa negociacion. Un di e motibonan ta e problema di e situacion na hospital.
Na e ultimo biaha e reunion a wordo para door di holo di diesel. Diamars tin un reunion programa den oranan di mainta. Ta spera cu no tin ningun incidente cu e CAO por bay door.
Cu ken lo sinta
Maduro a splica cu for di comienso, nan a sinta nan so, esta ABV y gerencia di Hospital. Pero di dos reunion caba, a wak cu mester ayudo di mediador di gobierno y e ta na mesa.
Con leu nan ta
Segun Gina Maduro, nan ta hopi curu ainda. Loke nan ta bay haci ta entrega nan wensenlijst. Di parti di hospital nan a duna nan calculacionnan. Un di e problemanan cu tin na hospital, cu locual cu sindicato tin diferencia di opinion ta, cu e ta un contracto colectivo. E ta papia su mes: Collectieve Arbeids Overeenkomst. Gerencia ta pone tur hende hunto. E ta pone e CAO’ers y e IAO’ernan. E 130 IAOernan ta pisando hopi. Esey ta e discusion continuo cu tin.
Pakico lo bay boga
Lo bay boga pa beneficio y aumento di salario. Mirando costo di bida cu a subi ultimo tempo y tur e situacionnan cu tin actualmente na Aruba cu no ta facil, desde 2013 tabata tin e ultimo indexering. Poder di compra a bay atras cerca tur hende. Como trahado, nan a sinti’e tambe. A pidi aumento di salario, a pidi aumento di pensioen.
Te awor aki e ta 11.5%. Ainda e ta abao segun Maduro. Pero e ta subiendo poco poco cu 0.5%. Tambe nan kier algun beneficio secundario cu nan kier mira mehoracion aden.
Suma fiho
ABV ta prefera pa tin un suma fiho, y no porcentahe. Ta boga pa e CAOernan mas tanto. 1% di e salario di director, e ta bay cu tur, segun Maduro. Pesey ta bay pa un suma fiho. Tin cu negosha cun’e y e ta e prome para den rij pa cobra.
Ki tempo lo caduca
E CAO a caduca na Mei 2018. Imsan si nan ta negoshando for di di aña pasa Mei, riba e mesun motibo, cual ta e parti financiero. Ta spera cu nan por clausura prome cu fin di e aña aki, Gina Maduro a bisa por ultimo.
