Tabata pa exactamente 6:02pm cu a sosode un accidente serio na altura di Kamini Kitchen na San Nicolas, riba e caminda pa bay Lago Colony. E accidente tabata entre un auto V-Wagen marca Hyundai modelo Accent color shinishi, cu a dal den un brommer marca Yamaha. E motociclista a fayece na e sitio mes.
Investigacion di Polis lo mester determina awor con e desgracia a sosode. Un rato despues Dr. Texier a constata morto di e motociclista Gilbert Geronimo “Bushman” Geerman, naci na Aruba dia 20 december 1976 pues tin 42 aña di edad. E ta yiu di e conocido cunukero Romulo Geerman y ta traha cu su tata den cunucu.
Mester menciona cu “Bushman” ta masha popular na San Nicolas y no ta conoci solamente pa su envolvimento cu agricultura y cosecha, sino tambe cu coremento di brommer. For di edad relativamente hoben e ta maneha motorcycle, pa cual su amigonan ta puntra nan mes kico por a sosode cu awe e no por a controla su vehiculo.
E caminda aki entre e crusada di Kamini Kitchen y e anker pa drenta Lago Colony den pasado a yega di experencia mas desgracia, entre nan cu consecuencia cu esunnan envolvi a resulta gravemente herida. Polis awor, a base di e investigacion lo mester determina con e accidente a sosode y pa mira despues con por haci cambio of adaptacion riba e caminda pa evita ripiticion. Ta un cuestion di sea velocidad halto of falta di bon visibilidad riba e caminda.
Nos ta expresa palabranan di hopi condolencia na famia di Gilbert Geerman. Cu “Bushman” sosega na paz.
