ATCO Concrete a crusa lama pa basha casi 300 m3 di beton

5156

For di diasabra marduga te cu diadomingo atardi, mas o menos 24 empleado dinamico di ATCO Concrete Products a mobilisa no menos cu 35 truck di beton for di Barcadera pa De Palm Island, riba barco, pa basha 280 m3 di concrete riba e isla. E trabou profesional aki a cana sin ningun contratiempo, uzando ekiponan profesional y e formula di trabou eficiente di e compania, combina cu trahadonan experencia y bon prepara pa tipo di trabounan specialisa asina.

“No ta prome biaha. Orguyosamente nos por bisa cu 13 aña pasa, exactamente dia 19 di maart 2006, tabata ATCO Concrete mes cu a basha concrete riba De Palm Island pa construccion di nan waterpark. A toca nos e honor aki atrobe pa bolbe demostra nos profesionalismo den e tipo di trabounan aki, entregando producto di calidad superior”, asina Robby Fingal, Operations Manager di ATCO Concrete Products a duna di conoce diadomingo atardi ora cu a baha for di e isla.

Mescos cu 13 aña pasa: ATCO CONCRETE A CRUSA LAMA PA BASHA CASI 300m3 DI BETON – Trabou grandi pa engrandece De Palm Island

Mescos cu 13 aña pasa: ATCO CONCRETE A CRUSA LAMA PA BASHA CASI 300m3 DI BETON – Trabou grandi pa engrandece De Palm Island

Posted by 24ora on Thursday, October 10, 2019

E trabounan a inicia diasabra pa 4:45am, ora e trucknan di concrete di ATCO Concrete Products a cuminsa carga material pa despues subi barco Don Andres I na waf di Barcadera. Na tur, ATCO Concrete Products a tira 5 trip diasabra y 1 trip diadomingo, pa na tur yena 35 truck cu beton.

Den un trayecto di mas o menos 15 minuut riba lama, a yega De Palm Island pa ey descarga concrete na e areanan asigna pa Van Kessel Havenbouw, cu ta encarga cu e proyecto grandi aki. E trabou tabata bou supervision di Ing. Hendrick Croes di H.J.C Engineering, cu contribucion di Gino Geerman y su specialidad pa ehecuta tipo di proyectonan asina.

Contrario na trabounan normal, pa e proyecto aki a haci uzo di un cement special, procedente for di Hulanda. A warda 2 luna pa e material aki por a yega Aruba, pasa den e fabrica profesional di ATCO Concrete Products pa prepar’e, transport’e y finalmente bash’e riba De Palm Island. E cement aki yama “hoogoven cement” y ta pa uzo riba proyectonan cu clima special, manera De Palm Island cu ta exponi na hopi solo, biento y salpeter.

“Ta un di e proyectonan di mas special cu nos a realisa e aña aki na ATCO Concrete Products. Nos tin hopi tempo ta prepara, pasobra no ta asina-asina ta subi cu trucknan pisa asina riba e isla pa basha concrete. Mester haci hopi preparacion, diseño, pruebanan, prome cu tin e infrastructura cla pa ehecuta e trabou na un forma profesional y eficiente”, asina Robby Fingal a splica cu un cara di satsifaccion.

E proyecto riba su mes ta encera un waterpark nobo riba e isla, dedica na adultonan. Teniendo cuenta cu mester traha piscina y un toren halto for di unda por slip bin cay den pool, a rekeri fundeshi special, uzando cement y concrete specialmente prepara pa e proyecto specifico aki.

ATCO Concrete Products ta gradici De Palm Island pa a bolbe deposita confiansa den nan, tanto pa e producto di calidad cu ta ofrece combina cu e servicio profesional na momento di entrega y basha concrete.

Tocante ATCO Concrete Products

Desde aña 1988 a crea ATCO Concrete Products, e tempo ey riba parkeerplaats di Hyatt Regency Hotel & Casino. Esaki tabata nan di dos cliente, e prome tabata Sonesta Hotel. Na 1992, ora a caba cu construccion di Hyatt, a muda pa nan localidad actual na Barcadera. Ta bon pa bisa cu na un principio e compania tabata haci uzo di un planta di concrete cu por a produci un total di 16 m3 pa ora. Mientrastanto, den e añanan, debi na demanda y mercado, a inverti den un di e plantanan di concret mas grandi y moderno den henter Caribe, cu tin un capacidad di produci 120 m3 pa ora.