Diamars mainta, e parlamentario di Partido di Pueblo Arubano (AVP) a vocifera su mes fuertemente riba e posicion cu Prome Minister Evelyn Wever-Croes a tuma den e caso di Arubahuis, specialmente tras e declaracionnan cu e mandatario mes a haci diabierna ultimo prome cu su biahe pa Hulanda. Pa e parlamentario di oposicion, e palabranan di e premier ta confirma loke su fraccion a bin ta sospecha pa casi un aña caba y esey ta cu Minister President Wever-Croes ta tapando e echonan di corupcion cu a tuma luga pa scapa cara di ex minister plenipotenciario, su cara como e minister responsabel y esun di su partido MEP cu ta punta dede riba otronan, pero su mes ta falta integridad.
“Cocolishi oficialmente no ta djis sede di gobierno, pero tambe Ministerio Publico y Minister President tambe ta Procurador General. Ta bisa esey pasobra tin un aña largo ta puntrando e mandatario kico tabata e situacion cu a tuma luga na Arubahuis durante ultimo dos a tres aña. Un situacion cu nos a wak te hasta nan ex partner den coalicion a saca un carta publicamente demostrando cu tabatin corrupcion grandi a tuma luga door di e minister plenipotenciario Guilfred Besaril,” asina e parlamentario a inicia su declaracion.
Te diabierna ultimo, segun parlamentario Croes, por fin a haya hopi y practicamente tur clarificacion y por a confirma cu minister president ta tapando un caso di corupcion den su gobernacion. Durante conferencia di prensa a confront’e cu algun pregunta na cual a indica cu dialuna mainta e ta na Arubahuis. “E tematica di investigacion no mester wordo trata na Den Haag, pasobra e investigacion a wordo haci caba,” asina Croes a bisa citando e declaracion di e premier.
Pa e relato completo, lesa edicion di TREMPAN
