“Mi ta sorprendi”, ta locual Gerlien Croes di fraccion di AVP a duna di conoce awe durante tratamento di suma di donacion otorga sin aprobacion di parlamento. Minister di Economia actual Geoffrey Wever a duna declaracion na prensa riba e motibo cu e ta den parlamento y e peticionnan cu e tin pa atende.
Minister Wever a bin pa haci dos peticion, e prome ta un suma di 123 mil florin pa e haci como donacion na Qredits pero ademas di esaki a inclui un articulo number dos, bisando cu e minister e tempo ey, esta Minister Xiomara Maduro a otorga di su banda un otro suma di 217 mil florin, di cual nunca el a busca aprobacion di dje den parlamento di Aruba.
Di otro banda Minister Maduro kier hustifica su accion bisando, cu ta algo cu tabata presupuesta y con por bin cuestiona e stichting en cuestion.
“Hamas durante e reunion aki, ningun miembro di fraccion di AVP a pone den duda stichting Qredits”, ta locual Gerlien Croes a enfatisa. Tin di menciona cu stichting Qredits ta un proyecto cu fraccion di AVP a mes a traha y trece Aruba for di Europa pa yuda companianan na Aruba , cual na momento di pandemia a hunga su rol y di cual awe e gobierno aki ta pluma cu ne.
Tin di separa e dos echonan
Minister Wever awe, como colega di Minister Xiomara Maduro a bin pa tapa p’e. Como minister bo ta responsabel na momento cu ta uza placa/ fondo di pueblo, ta na su luga pa haci esaki como debe ser. Minister Maduro a ripiti y ripiti cu el a presupuesta e suma pero ta bon momento pa inform’e, como cu ta parce cu ta bisto cu e no tabatin door, cu tin cu trata un ley pa locual ta separa di e begroting, pa locual ta contabilidad.
El a surpasa dies mil florin
Ley ta bisa cu bo por haci un donacion te cu dies mil florin, na momento cu surpasa esaki tin cu bin haci un peticion den parlamento pa haya un aprobacion pe’. E suma en cuestion ta di 217 mil florin.
Storia di pandemia no ta caba nunca mas
Keto bay ta sconde tras di cortina di pandemia tres aña despues. Tempo tabatin suficiente, nos ta den 2023, ta locual parlamentario Gerlien Croes a bisa. Ademas di esey tabatin tempo suficiente pa yama reunion y trata ley di spearfishing pa despues manda su gobierno cas y manda su minister cas. Pero pa un suma di 217 mil florin cu mester di aprobacion, no tabatin tempo.
Minister Wever a bin descubri e ‘batata cayente’
Na momento cu stichting Qredits a bin pidi Minister Wever pa un donacion, cu a tuma posicion di minister na 2022, muy probablemente lo a cay riba e echo den e cifranan cu Minister Xiomara Maduro tabata parti placa, pero no tin ley pa partie.
Mesora a haci pregunta na Minister Wever si acaso e ta dispuesto pa laga e articulo dos afo, cu ta esun pa salba Maduro di e puinhoop cu e ta aden, Wever no a duna contesta.
Maduro a reacciona bisando cu e accion ey lo ta un ‘muchachada’ y como hurista Gerlien mester por sa cu ta politica barata. Al contrario Croes a duna di conoce cu ta net lo contrario, como minister e mester sa cu no por haci uzo di fondo/placa di pueblo con cu kier y despues busca manera pa bin dek e situacion den parlamento.
Partido RAIZ ta integro ?
Como partido cu a bin ta gaba di ta integro y como partner den coalicion, e tempo ey ainda no tabatin ni e intencion pa subi lista politico, pero awe ta bin tres aña despues tapa mal uzo di fondo di pueblo bou di e capa cu como cu a bin pidi p’e, lag’e hinca esun di e minister anterior tambe di biaha aden.
Tin di ‘ fix’ x pa Maduro no haya su mes ta paga e placa aki for di su mes un saco.
Parlamentario Gerlien Croes ta di opinion cu miho cos Maduro por haci ta cuminsa entrega auto, baha su gasto y cuminsa conoce su leynan en bes di tilda otro di no sa nan trabou mientras e ta mas cu bisto cu ta e ta esun cu no sa di dje.
