Trahadonan di ASTEC a pone trabao abao pa dos ora, di 3’or pa 5’or, pa motibo di un mal contento relaciona cu CAO. Randall Angela, maintenance Manager di ASTEC y a duna un reaccion di banda di gerencia riba loke ta e situacion.

El a splica cu nan a haya un peticion di e trahadonan awe merdia, cu awe tardi nan kier a bin cu un reunion pa demostra nan mal contento cu por ta surgiendo entre nan. Manera semper, ta nan derecho y nan a bay pafo. E parti di gerencia ta cu e CAO a cuminsa na October cun’e. STA a gana e referendum y a haya nan ta sinta cu nan. A bay basta largo cu nan na mesa y tabata hopi cerca, pero na final no a logra. Den e temporada di pasco naturalmente a dicidi pa suspende y a bisa cu toch tin esey cu ta keda vigente. A opta pa djis warda e ora. Den transcurso cu aña habri lo sinta bek.

 

Cinco aña

E trahadonan ta bisa cu nan tin cinco aña sin un CAO firma. Mas bien cu gerencia ta pone loke nan kier den cualkier aumento cu tin mester, y pa nan nan no ta di acuerdo cun’e. Segun Angela, tin un CAO cu ta keda renoba su mes tur aña. Tur partido tin cu zeg’e op. Den e caso aki na October, ni UPA ni ASTEC no a zeg’e op, pasobra no tabata tin nada cla.

Tin un CAO cu ta vigente y de paso e ta bolbe vence fin di December. E idea ta como Astec, pa yega na un CAO nobo pa motibo cu despues cu a cambia, biniendo Barcadera, tin hopi cos cu a cambia. Hunto cu e cambionan ey, tabata di adapta cierto cosnan.

 

Trahadonan kier mira adelanto

Angela a comenta cu e parti di locual cu ta den e CAO mester keda semper igual. No por bay cambia un cos cu ta firma caba. Loke cu ta stipula den dje, ta mas bien e cifranan di aumento cu nan ta pone eynan. Nan ta bao di e pensamento cu e aumentonan cu antes nan tabata biba cun’e, ta loke cu ASTEC mester honra nan bek. ASTEC ta mira esaki tiki diferente, pasobra tin inversionnan hopi mas grandi, di e situacion di loke ta bayendo. Nan mester ta cauteloso cue mercado. Obvio no por haci esaki. Gerencia tabata hopi habri pa no solamente na cifra, y a bin cu diferente proposicion na nan. E negociacionnan tabata bayendo na bon esfera y hasta por bisa cu nan a yega hopi cerca cu STA. No tabata e issue financiero. Sino tin papia di un handbook cu STA no tabata di acuerdo cun’e.

Antes tabata tin un CAO cu tur cos hinca den dje y ASTEC a separa esaki un tiki di dje. Tambe tabata tin inkietudnan over di overtime, si e ta obligatorio, si of no, etc. Eseynan tabata e inkietudnan cu nan tabata tin.

Decisionnan contra trahado

Angela a comenta cu nan no ta haciendo nada contra ley. Esaki tabata bao di sugerencianan tambe, incluyendo departamento di labor. Ta algo hopi normal. Cada compania ta adapta cierto cosnan cu e tin. Pero no tin nada cu nan lo haci cu tin di haber contra di e derecho di e trahado.