E cantante Gegeman tin un cantica nobo y dialuna a graba su video clip di dje. Ta trata di e cantica ‘Den Bario’ y esaki tin un nificacion importante p’e cantante. E cantante Edward v/d Biezen tambe ta forma parti di e tema musical nobo di Gegeman.
Gareth Rosa, conoci como Gegeman, a splica cu e cantica ta basa di e bario cu el a lanta. Motibo cu el a bin cu e tema aki ta pasobra e mester mustra Aruba completo cu a pesar cu e bario Seroe Patrishi tabatin mal nomber den pasado, asina mes tin talento den dje. E mes ta un talento cu tin basta proyecto na caminda y tin cu el a lansa caba.
Rosa ta bayendo pa su di tres aña como artista serio. El a indica cu su manager Rawie a acerc’e cu hopi plan den su careda di musica. E ta weita hopi resultado, pasobra el a graba cu Mosta Man di Corsou e cantica ‘Deep.’ El a traha cu otro artista manera Jeon y Ty.
Un di e canticanan cu e tin ta ‘Deep’, cu ta conta di su bida personal. Pero awo e tin e cantica aki den version duo cu Mosta Man. Un otro cantica ta ‘Hopi Speed’ cu Flow Pesaw, y despues a saca e cantica ‘Stap’, cu tin di haber di e pasonan cu e ta tumando.
Edward v/d Biezen, conoci como Etto, a splica cu e ta hunto cu Gegeman e biaha aki y den un genero diferente. Pa loke ta trata e video clip, esaki tabata un idea di Gegeman. E cantica ta un storia y ta basa riba un realidad.
V/d Biezen mes tin mas di binti aña den e mundo di farandula. El a cuminsa cu su diestres pa diescuater aña, y awo ta apoya cantante hoben. E ta canta den diferente genero. Pa un artista por keda conecta, e mester por canta den tur genero.
Rawie Misier, manager di Gegeman, a indica cu nan tin un aña bezig cu diferente proyecto. ‘Den Bario’ ta e proyecto mas recien. Dialuna a graba e video clip den e bario di Seroe Patrishi. Segun Misier, e video ta papia di un scenario di asesinato cu a pasa den e bario. E cantica tin un mensahe di cual ta papia pa stop tur cos asina.
