Famia Real ta na caminda. Gobierno ta den ful swing cu e preparacionnan, embeyecimento di nos isla, door di basha un capa nobo di asfalt riba e camindanan cu e famia real lo pasa.
Algun dia, Minister di Infrastructura, cu ta encarga cu e cartera di DOW, tabata dne parlamento pa asina pidi aprobacion di un suma di riba 300 mil florin y Parlamento a aproba esaki, pa asfalta diferente caretera riba Aruba. Un di e camindanan tabata esun principal, dilanti Cas di Gobernacion, LG. Smith Blv. Pero tambe ta importante pa basha un capa di asfalt riba e caminda di Sta. Cruz, for di The New 88 Food Mart te cu cede di MEP, como tambe e caminda band’i Superfood, e rotond, tambe lo haya un capa nobo di asfalt.
Rey Willem-Alexander, Reina Maxima y Prinses van Oranje, Amalia lo ta na Aruba den cuadro di un bishita oficial. Door di esaki tin ful un desaroyo ta tumando luga, ta bashando asfalt riba L.G. Smith Blvd. Pero a ricibi diferente comentario cu tin varios caminda di santo, Tanki Leendert, San Fuego, etc, cu tin varios aña ta boga pa un capa di asfalt riba e camindanan.
Pero pa Gabinete Wever-Croes II tabata importante pa prome drecha e caminda pa cos mustra bunita, pero p’e pueblo ta kehando, unda cu e barionan a solicita pa asfalt den bario, pero pa nan nunca tabata posibel. Varios Gobierno, di diferente asignatura, a bin y bay, pero nada di asfalt pa e barionan.
Mientras tanto, asina cu a haya sa cu e famia real ta na caminda pa Aruba, diripiente a bay Parlamento pa busca aprobacion pa un proyecto di asfaltamento di e camindanan, haci cu cos ta masha bunita riba nos isla.
Diadomingo DOW tabata trahando duro pa basha un capa di asfalt riba e caminda principal dilanti di Centro di Gobernacion di Aruba.
Pueblo no tin nada contra, pero si nan ta pidi pa tene nan tambe na cuenta, pasobra cu mientras cu ta drecha e camindanan cu no ta dje malo ey, tin varios otro caminda, unda cu ta parce cu ta riba luna nan ta core. Sin laga afo, cu e daño cu e buraconan ta haci na e autonan.
DOW ta trahando duro, riba overtime, pa asina keda cla prome cu e famia real yega nos pais.
