Frits de Palm ta yiu mas chikito di Adri de Palm. E ultimo aki tabata e prome candidato cu a yega di mobilisa miles di hoben den un activismo politico nunca antes bisto na Aruba.
Na aña 1979, e hoben Adri de Palm a subi lista di AVP como candidato #29. El a bira un forsa di activismo politico di hobennan desde e prome dia. Hunto cu hoben lider nobo, Henny Eman, bou di e acogedor melodia di “Ban Cas Bek” componi y canta pa Robert Jeand’or, nan a transforma e panorama politico di Aruba. Partido AVP a conoce un revitalisacion historico. Di ningun asiento den Parlamento pa e di dos partido mas grandi na Aruba. Adri de Palm a bira e di tres votegetter na Aruba despues di Betico Croes y Henny Eman. Un era nobo den politica e mobilisacion di AVP a crea y un activismo grandi bou di hobennan.
Awor Frits, 29 aña di edad, tambe a sinti e yamada pa apela na nos hobennan pa bira activo. Durante e 20’s & 30’s New-Year Meet-Up di PHP na Cas di Partido, Frits de Palm a tene un elocuente discurso cu un yamada na hobennan pa bira activo. Frits de Palm: “Rond di mundo ta sinti cu economia y politica mester bay dirigi su mes atrobe riba e Common Good – E Bon Comun ! Esey ta nos reto, na Aruba sigur! E contesta di mucho hopi hende, di mucho hopi hende hoben manera nos, ta cu “ami no por haci nada. Esaki ta desaroyonan mundial cu ami no por influencia, corda cambia.” Of “ami no por haci nada, p’esey mi ta wak pa mi mes bay dilanti. Mi no ta mete den politica. Well I have news for you: Politica si ta mete cu BO y BO famia !
E hoben Frits a enfatisa cu “politica ta duna un sin fin di oportunidad pa traduci nos conocemento y sentido di responsabilidad den accion pa nos logra e Bon Comun pa henter Aruba”. Pa pone forsa di un idioma cla y directo tras di su mensahe Frits a clausura cu e statement fuerte aki: “We are tired of Friends & Family politics; its time for the Common Good! Ban Stop di para na banda y critica sin actua: Na Merca den un campaña pa stimula hobennan pa bay vota nan a desaroya un bunita lema: Show-up or Shut up!
E anochi aki tambe na Cas di Partido a inclui duna reconocimento pa activismo politico cu un mural caminda por aprecia hobennan cerca y hunto cu lider di Partido Mike Eman riba e ruta di campaña den un Jeep. E mural a keda inaugura pa hoben musico Eldrick Boekhoudt y den memoria di Juan Mackintosh dor di su yiu muhe Jimena Mackintosh. Riba e Jeep por aprecia e activismo di diferente hoben cu desde practicamente chikito ta milita sin miedo pa nan partido y pais.
Un bunita reconocimento pa e hobennan aki cu ta SHOW-UP cu curashi. E invitacion pa e Meet-Up a worde fortifica cu citacion di un expresion haci dor di un lider politico cu a inspira hobennan rond mundo, Robert F Kennedy:
“Each time a man stands up for an ideal, or acts to improve the lot of others, or strikes out against injustice, he sends forth a tiny ripple of hope, and crossing each other from a million different centers of energy and daring, those ripples build a current that can sweep down the mightiest walls of oppression and resistance.”
A reina un ambiente ameno na Cas di Partido y por a sinti e interes creciente den bira mas activo cerca nos talentonan hoben.
