Siman pasa Gabinete Wever-Croes a anuncia cu lo ta introduciendo un cobransa yama “crisisheffing” relaciona cu e situacion financiero di Aruba. Den nos bista, scoge pa sea introduci of aumenta un impuesto riba lomba di pueblo ta un di e ultimo recursonan cu un gobierno lo haci despues di a cumpli cu otro tareanan, segun parlamentario di fraccion di AVP, Robert Candelaria.
Ta asina cu cifranan ta dunando netamente un indicacion cu enbes cu Gabinete Wever-Croes a concentra riba reduccion di gasto a bay over na aumenta esakinan drasticamente. Manera ta conoci, mi a haci pregunta na prome minister pa duna splicacion over gastonan nobo cu gobierno tin relaciona cu hendenan cu a wordo tuma den servicio di gobierno y tambe gastonan di bufete di abogado y consultants. Wardando riba e contestanan, mi ta keda haya e impresion cu no a cumpli cu e promesa di por ehempel reduccion di gastonan di ministerionan y coordinadornan cu den opinion di gobierno durante campaña y formacion lo a contribui significantemente na baha debe di pais Aruba. E accion di emplea y crea yen funcion nobo cu nunca tawata existi den e aparato gubernamental tambe ta hunga un rol den gastonan cu a aumenta bou di Gabinete Wever-Croes. Esakinan ta gastonan excluyendo honorarionan di por ehempel abogado y consultants cu ta riba cuenta di e pueblo.
Comosifuera ta poco, fuentenan di entrada existente di gobierno tambe a wordo elimina. Nos ta referi aki na e belasting riba carrentals cu Minister Romero a anuncia cu lo wordo aboli. Esaki sigur ta cuestionabel pasobra e no ta un decision cu a wordo tuma basa riba un analisis obhetivo riba henter e situacion financiero di nos pais. E pregunta cu ta surgi e ora ey ta: si nos pais ta den un crisis, pakico bo lo elimina fuentenan existente di entrada? Si tabatin cu mehora e sistema di impuesto aki, mester a scoge pa mehoracion y no eliminacion. Bo no por ta papiando cu 2 lenga cu pueblo. Bo kier subi impuesto riba henter e pueblo y na mes momento bo ta elimina impuesto riba un grupo di empresa cu tabata wordo paga door di turistanan.
Algun ehempel ariba menciona ta duna un indicacion cu Gabinete Wever-Croes ta actuando di un forma sumamente contradictorio y inhusto den tur aspecto. Na prome luga un gobierno responsabel lo no bay afecta poder di compra di tur ciudadano sin cu e mes no a haci su maximo esfuerso prome pa maneha finansas publico manera debe ser. Gabinete Wever-Croes mester tawata un ehempel pa pueblo door di mustra cu lo a reduci gastonan na un forma drastico internamente prome. Adicionalmente mester a evalua tur fuente di entrada existente y no scoge ligeramente pa elimina esakinan sin base, siendo cu esaki lo por afecta bo estado financiero. Esaki ta duna e impresion cu no tin un vision y un liña di maneho den e coalicion pa cu nos finansas publico. E ta hopi contradictorio pa anuncia crisis mientras bo mes ta percura pa corta bo propio fuentenan di entrada. Pa e motibonan aki e ta incomprendibel y condenabel cu lo ta cobrando pueblo mas belasting via BBO y mas accijns via gasolin afectando nan poder di compra sin cu gobierno mes a tuma pasonan responsabel pa por a hiba un maneho di finansas publico na un forma responsabel. Gobierno mester cuida cartera di su ciudadanonan prome, cuminsando cu esunnan cu menos forsa di compra y no pone nan paga mas y na mes momento cuida e grupo su interes cu menos mester di e cuido aki.
