Dialuna mainta, banda di 9’or y mey, miembro di e diferente fundacionnan di animal a presenta dilanti di Servicio Veterinario na Wayaca, pa mustra nan disgusto encuanto e killcage of afmaakhok.
Parce cu e situacion aki ta uno alarmante cu ta data di mas di 20 aña, unda cu animalnan no desea ta wordo drumi na un manera cruel. Tin basta keho ta drentando cu ta scucha gritamento y batimento for di e killcage y esaki a wordo denuncia atrabes di algun medio di comunicacion. Lastimamente no tin prueba di e torturanan aki, debi cu esaki semper ta sosode tras di porta cera “onder slot en grendel” y na momento cu drenta paden, e luga ta gespuit y haci completamente limpi.
Sinembargo si tin un video ta circulando unda cu e cachonan ta wordo mal inyecta y ta keda agonisa pa oranan largo. E ta un situacion sigur di lamenta, mirando cu esaki ta bin ta sosodiendo pa mas di 20 aña y ainda no a busca un solucion adecuado pa cachonan indesea.
Miembro di e fundacionnan na e sitio a mira algun cacho ta cana rond y pa evita cu nan core cu e mesun suerte di esunnan cu a drenta killcage, a dicidi pa hiba nan pa asina nan haya un cuido manera mester ta.
