Sumamente exitoso tabata e di 44 Festival di Dande, propio composicion y Tipico cu a tuma luga riba dia 29 di December ultimo tabatin 13 agrupacion cu 33 cantante di Dande.
Na final di anochi a sali e resultado for di e cuerpo di hurado cu e Rey di Dande 2017 ta Jason Kelly, y e Reina di Dande 2017 ta Veloushka Krozendijk. E ganado di propio composicion ta Jonathan Croes acompania pa e Alma Folklorico y ganado Tipico ta Sonido di Antaño cu un wals instrumental.
Un palabra di pabien na tur cantante di Dande cu nan gran presentacion. Un palabra di gratitud na e publico grandi cu a presencia e festival di Dande cu ta di Nos. Un gratitud ta bay na prensa di Venezuela, Hulanda y specialmente na prensa di Aruba, radio, corant, y televisionnan.
Fundacion a reuni riba e exito di Festival di Dande y durante e reunion aki a keda stipula e fecha pa e festival “Un Canto pa Aruba Su Himno y Bandera” caba.
E festival aki lo bay tuma luga riba e dianan 8 y 9 di maart cu lo ta e pre-final y riba diadomingo 11 di maart lo ta e gran final di e festival.
Fundacion Cultural di Festival Folklorico ta gradici Gobierno di Aruba, Departamento di Cultura Aruba y CCDN bou auspicio di Ministerio di Cultura y Comercio pa e gran sosten na e exitoso Festival di Dande. Na e mesun momento ta desea pueblo di Aruba un bon y feliz Aña 2018 den nomber di Presidente di Fundacion sra. Jessica Croes.
