Diamars anochi a tuma luga un charla na Fundacion Rancho. Ta un charla cu normalmente ta tene riba 16 di Februari, pa asina keda recorda kico a pasa cu Aruba tabata un dia den guera, cual ta dia 16 di Februari 1942.
Segun Clifford Rosa, presidente di Fundacion Rancho, ta purba di adapta un tiki, pero diamars a duna un tiki mas contexto riba e parti maritimo.
E conocido historiador, Dufy Kock, tabata tey presente pa duna su punto di bista. El a duna su contexto kico tabata e rol di piscadonan di Rancho cu a sali riba lama y duna un man na momento cu cosnan tabata sosode riba lama.
E parti humanitario di Rancho a bin dilanti y pa mustra cu tin hopi informacion cu falta pa documenta. Ta procesonan cu ta pasa aden pa asina por sigui documenta y conserva locual ta historia y cultura di e bario di Rancho.
Segun Rosa, si nos mira bon, 70 aña pasa, Nacionnan Uni a cuminsa cu un proceso di paz, pa nunca mas no yega bek den guera. Pero nos ta den un area cu ta sumamente volatil awor aki. No por lubida cierto historia y nos no kier pa tipo di historianan asina ripiti.
Ta un parti cu ta concientisa nos generacionnan pa nan sa mas di nos historia y percura pa e no ripiti.
Guera ta un topico hopi fastioso, ta trece e tema aki dilanti pa nos concientisa nos mes.
Rosa ta gradici Jeanelly Quant, coordinadora di Centro Actividad Rancho cu un biaha mas a setup e luga. Danki tambe na sr. Dufy Kock, cu sigur un cabayero di mas di 80 aña, activo y tambe ainda cla pa sigui yuda y educa. Tambe por mira e acogida di e hendenan cu ta hoben cu ta biniendo pa e charla, cual sigur por a mira e exito cu e charla tabata tin.
