Departamentonan di Asuntonan Economico, Departamento di Salud Publico y Cuerpo Policial a tene nan control rutinario y a cera un supermercado pa 24 ora pa motibo cu e no ta cumpli cu higiena.
Ta trata di e Food Center na Piedra Plat y e tin 1 dia pa regla su asuntonan unda cu diaranson 14 di februari e departamentonan concerni lo pasa bek. Lo ta controla un biaha mas pa mira si nan ta cumpli y por habri bek.
E controlnan ta continua unda ta bishitando diferente supermercado. Asina cu aña a cuminsa e departamentonan a cuminsa cu nan controlnan y lo sigui haci esaki durante aña, representante di Cuerpo Policial, sra. Kock, a bisa. E lo bira algo rutinario pa nan, unda cu lo ta controlando permiso, higiena y prijs. Cada departamento lo ta haciendo e control riba nan cada tereno. Pueblo por ta sigur pa mira cu como departamentonan di gobierno, nan ta haciendo e controlnan manera debe ser.
Mirando su experencia el a pasa aden cu door di ta cerando un luga, e ta dolor pa nan cera 1 dia. E luganan ta haci nan maximo esfuerso, pasobra e departamentonan ta yega inespera y tin e luga manera debe ser. “Awe mi ta haya cu a bay basta bon. Bo ta haya semper un ke otro, pero hopi bon encomparacion cu antes,” el a expresa. Antes e hendenan tabata menos consciente cu eigenlijk ta brinda pueblo, un hende cuminda, y mester ta hopi higienico. E cooperacion cu doño di e luganan ta bayendo tremendo y ta spera cu esaki sigui asina.
Ta tene e controlnan aki pa asina pueblo por haya productonan na e prijs basa na e canasta basico cu gobierno a fiha. Tambe cu e luga ta cumpli cu tur permiso y higiena. Consumidornan cu si ripara cu algo ta robes por entrega nan keho na departamentonan concerni y asina pueblo por haya un bon servicio y productonan di bon calidad.
