Bida por bira hopi druk! Tin biaha ta parce cu nos como adultonan tin e custumber di ta na careda, tanto mentalmente como fisicamente. Tur ora tin pura. Y tur ora ta pura nan yiunan sin realisa cu porta e muchanan ta gosando completamente di locual nan ta haciendo e momento eynan. Hasta ora ta periodo di vakantie nos como adulto tin e tendencia di pensa henter ora riba locual nos tin cu haci ainda. Y sin cu bo sa, ta lubida con importante e ta pa ta presente pa bo yiunan y tuma tempo pa nan, enbes di bisa nan “otro biaha” of “ora mi tin mas tempo.” Tempo cu bo yiunan ta valioso. Gosa cu bo yiu awo!
E importancia di ta den e presente cu bo yiunan
Si bo ta concentra constantemente riba ‘loke ta bin despues’ bo ta perde oportunidad pa aprecia y gosa realmente di e presente, di ‘awo y awe’. Bo ta bira manera un observador di bo yiunan cu ta para na banda pasobra tur ora bo ta pura. Mientras bo cabes ta parcialmente den otro cos, bo yiunan ta cuminsa salta bo ya cu bo no ta totalmente disponibel pa nan.
● Un mucha ta ripara cu bo atencion no t’ey completo y e por cuminsa sinti cu e no ta mucho importante pa bo.
● E mucha por pensa cu e no tabata suficiente ‘bon mucha’ ora e no ta capaz pa logra haya bo atencion completo.
● E mucha por cuminsa busca bo atencion na un manera negativo.
● E por stroba e habilidad natural di mucha pa gosa di ‘awor y awe’ ora constantemente bo ta purba influencia nan pa pensa riba loke ta bin y ora bo ta pura nan pa haci pa caba.
Gosa di e momentonan actual (awo y awe) cu bo yiu(nan), ta duna bo un recompensa valioso: un aprecio grandi pa bo yiu. Bo yiu na su turno lo sinti cu bo ta tene cuenta cu ne, cu bo ta stim’e, proteh’e y cu bo ta compronde.
Pa bo tin tempo pa ‘awo y awe’ cu bo yiu(nan) no ta nifica cu bo mester tin un agenda of un situacion special pa crea esaki. E ta bay pa e cosnan chikito. Bo por join bo yiu ora e ta canta den auto. Of ora e ta lesando algo, bo por para banda di dje y puntra kico e ta lesa. Biba y gosa di e presente tampoco no ta nifica cu bo no ta preocupa mas cu asuntonan importante. E ta nifica cu bo ta si duna bo mes completa y cu bo ta contra bo mes completa riba bo yiu(nan) pa un cierto tempo.
Akibou ta sigui 7 sugerencia cu por yuda mayornan siña pa ta mas den presente cu nan yiunan:
1. Para locual cu bo ta haci y wak rond di bo
Train bo mes cu cada pasa tanto ora, bo stop pa un minuut cu locual bo ta haciendo.
● Hala un rosea profundo
● Wak rond
● Observa kico ta pasando
Probablemente bo ta keda sorpresa ora bo ripara cuanto otro cos bo ta mira y ripara awo.
2. E siguiente biaha cu bo yiu ta para pa mira algo, haci mescos cu ne.
Por ehempel, si bo yiu ta sak abou pa mira un fruminga of ta para dilanti un caha di cornflakes pa studi’e, haci mes cos. Dal para, mira y experencia e obheto hunto cu bo yiu.
3. Siña scucha bo yiu sin interumpi.
Encurasha bo yiu pa e conta di su dia y pa repasa su dia. Esaki ta un bon manera pa mustr’e con importante bo ta haya e cosnan cu e ta pasa aden. No haci demasiado pregunta y evita pa interumpi bo yiu cu comentario. Lag’e papia y concentra riba locual e ta conta bo.
4. Hunga cu bo yiu
Na momento cu bo tin tempo pa hunga cu bo yiu, purba hunga sin bo agenda: no pensa riba tur locual bo mester haci despues. Sigui bo yiu den loke e kier hunga, sea abierto pa loke e kier haci y pa loke e ta bisa.
5. Duna oportunidad pa ta spontaneo
Duna balor ora bo yiu ta haci algo spontaneo, hasta ora e por ta inconveniente.
Un ehempel: bo ta den cura ta bari blachi seco. Bo yiu a bula yen animo memey di e serito di blachi y ta cuminsa tira nan tur rond. Wanta bo gana di grita ‘No’ y lag’e hunga. Bo por hasta bula hunto cu ne. Pakico no? Despues e por yuda bo hala tur blachi hunto.
6. Concentra riba con bo yiu ta awor.
Mira bo yiu como un persona completo, a pesar di su edad. Esaki ta pa bo por sostene, stim’e, acept’e y apreci’e manera cu e ta. Concentra riba con bo yiu ta awo y menos riba con bo kier bo yiu ta of con bo kier pa bo yiu bira.
7. Stop di pospone y cuminsa awo
Nos tur ta pospone. “Mas oro mi ta hunga cu bo” of “mañan si mi ta pasa mas tempo cu mi yiunan”. Y asina nos ta pone varios condicion y motibo prome cu nos duna nos yiunan loke cu nan merece: nos atencion completo. Mas bo corda pa gosa cu bo yiunan ‘awo’, mas chens bo tin pa ta feliz cu otro. Pa e motibo aki, biba AWO cu bo yiunan ta nifica cu ora bo bira mas bieu lo bo no ta molestia cu e pensamento cu bo a perde asina hopi dushi momento den crecemento di bo yiunan. Al contrario, lo bo tin hopi memoria bunita di e momentonan cu bo a comparti hunto cu bo yiunan tempo nan tabata jong. Y nan tambe tin e memorianan bunita aki!
Pa informacion of pregunta por acerca Fundacion Pa Nos Muchanan – Cumana 2
Tel: 5834247/5880856 – Whatsapp: 6998900
E-mail: [email protected] – Website: www.fpnm.aw
