Den cuadro di e iniciativa di F.A.A. “bisa NO na abuso di anciano” (desde 2011), awe dia mundial di nos grandinan F.A.A. ta enfoca entre otro riba e fenomeno global di edadismo of discriminacion pa edad cu a yega e punto di un pandemia.
E discriminacion pa edad ta un fenomeno global cu tin consecuencianan grave pa hende y henter e comunidad. Edadismo ta referi na stereotiponan y discriminacion contra hende di adulto mayor basa riba e simpel caracteristica esta: di “Edad di 60+”. Segun informe mundial di Organisacion di Estadonan Uni (‘United Nations’) riba discriminacion pa edad, mita poblacion mundial ta contra hende di adulto mayor. Discriminacion pa edad a resalta den diferente area durante e pandemia di COVID-19. Algun ehempel di esaki ta desemboca den odio expresa den discurso publico y riba red social. Hasta cu unda e palabra holocausto a cay. (Tin diferente ehempel, incluso den mundo medico: e fenomeno di ranka plug, isolacion na cas y den institutonan di tur hende riba di 65, den mundo financiero, mundo bancario y abuso verbal)
E fenomeno di edadismo aki tambe a wordo enfatisa pa Secretario General di Nacionnan Uni, esta Antonio Guterres. Hopi ta e hende di adulto mayor cu tambe ta reconoce cu COVID-19 a intensifica discriminacion pa edad y e estigmatisacion di e hendenan adulto mayor.
A pesar di su impacto dañino, e discriminacion pa edad ta sigui di ta pa gran parti desconoci, pa hopi gobierno. Hasta ta consider’e mas aceptabel den comparacion cu otro forma di discriminacion.
Na nivel mundial ya a cuminsa studia e fenomeno aki y a propone algun estrategia con ataca e fenomeno aki. (Global strategy and action plan on ageing and health (2016–2030))
Algun punto cu ta resalta den e strategianan aki ta :
• Pa hiba campaña pa sensibilisa comunidad riba discriminacion pa edad
• Pa duna bos na e persona di edad pa nan por comparti experiencia real di discriminacion pa edad
• Crea sinergia cu trabou di conseho di derechonan humano y enfoca, riba derechonan humano di e hende di adulto mayor riba ‘Dia Internacional di e Persona di adulto mayor’ y dia 15 di juni Dia Mundial contra abuso di nos grandinan. E contenido di proteccion y inclusion di nos grandinan ta algo cu mester mas atencion. F.A.A. lo sigui cu e lucha pa un dia Aruba tambe por conoce banda di e leynan contra abuso di mucha, di bestia (cacho), di plastic, etc. pero tambe ley pa proteccion y inclusion di nos grandinan, leynan pa promove salud y bienestar den biehes. Tur esaki por sosode pa medio di reorientación di nos comunidad di tal manera cu nos sociedad lo percibi ciudadanonan di edad y atende nan cu respet. Tur esaki segun ‘Plan di Accion Internacional di Madrid riba envehecimento (2002).