Por a mira cu tin yen di desaroyo tumando luga na Serlimar y FTA den pasado tabata hopi fuerte pa bisa pa Pueblo no paga pa piki sushi na cas. Hubert Dirksz, presidente di FTA a splica cu awe nos no ta mucho leu cu e gobierno anterior.
Na unda cu a kere cu e gobierno anterior ta, cu mester a sinta na mesa pa yega na un acuerdo y esey no a pasa ainda.
E decision pa no paga tabata pa motibo cu a pone enfasis cu mester yega na un acuerdo pa un tarifa social. Tin hopi ciudadano, principalmente esnan desemplea y esnan cu ta biba di solamente un pensioen, ya caba nan poder di compra ta hopi debil. Tin un situacion cu nan tin cu paga AZV, nan tin cu paga pa transporte, nan tin cu come. Nan tin awa y coriente, etc. Nan situacion ta dificil.
Esey ta e motibo cu a bin cu un peticion, un proposicion pa gobierno pa un tarifa social. Ta lamenta cu awo ta papia si di tarifa social, pero kier forsa e hendenan bay paga.
Si no por paga prome y no por paga awo, pakico ta forsa, sin yega na un tarifa social. E punto ta keda balido. Sa cu e poder di compra ta asina dificil pa hopi ciudadano. Ban ta serio, sinta na mesa, yega na un tarifa social, e ora tin e problema tras di lomba. Laga nos no forsa un hende cu no por paga, paga toch. Y si e no kier paga, ta menas’e pa coy su bari di sushi. E ora e ta bira un problema mas grandi. E ora ta falta responsabilidad pa mantene e pais limpi. Pasobra no mester lubida, den ley ta poni cu Gobierno ta responsabel pa mantene Aruba limpi. Ta compronde esey. Mester paga, bo ta haya un servicio. Ta na su luga pa paga, si ricibi servicio. Sigur, Serlimar, den e situacion cu e ta, e tin derecho di existencia. E mester wordo sosteni. Ta di acuerdo pa paga, pero tin cu wak tambe e otro banda, cu ta e situacion social, e poder di compra di e ciudadanonan y esnan di menos recurso. E ora ey, ban sinta na mesa y yega na e solucion. Esey ta loke FTA ta pidi.
Debe
Dirksz ta sigui splica cu e barinan residencial y tambe comercial, ta un iresponsabilidad di gobierno y Serlimar. Ta compronde cu tabata tin acuerdonan cu no a bay bon. Tin hopi hende cu tin bari. Comercial ta diferente. Pero pa residencial, e punto ta cla cu si yega na un acuerdo manera trece e proposicion dilanti, awe no ta papia di problema. Pero ta parce cu politico, tanto esun anterior y esaki, ta para ariba cu esaki ta e decision, take it or leave it. Y asina aki no por traha.
Reunion
FTA a busca na varios ocasion a haci peticion na e gobierno anterior. Gobierno anterior a bay di acuerdo cu tarifa social. Pero bay di acuerdo y bisa si cu ta bay, no ta nifica cu ya tin un acuerdo pa tarifa social. Laga nos sinta na mesa formalmente, firma algo y ta cla. No ta asina cu si awe, debe un suma di 25 florin pa luna y kier bay cobra un cantidad di luna atras cu no a paga. Si no por paga ni awo, con lo por bay paga esun cu debe, mirando e situacion. E ora ta iresponsablemente bezig, segun Hubert Dirksz.
