Mami, dicon e luna ta sigui nos? Di con tin avion den e shelo? Dicon mi mester bisti un carson? E Dicon-Fase por ta duro, pero e ta un stap importante den e desaroyo di bo yiu. Asta si bo no tin e forsa mas pa contesta tur su preguntanan cu porta pa bo ta preguntanan sin balor, nan si tin balor pa e muchanan.
Segun un estudio di Universidad di Michigan, e motibo cu peuters ta puntra “dicon” asina hopi ta pasobra nan di berdad kier un splicacion y no paso nan kier irita bo.
Estudio
Segun e estudio a bin dilanti cu muchanan cu a haya un bon splicacion riba nan pregunta ta satisfecho cu e contesta y no ta puntra mas of nan ta pensa riba un ‘follow-up’ pregunta, mientras e muchanan cu ta haya un contesta vago ta keda puntra e mes un pregunta.
Contestanan manera ‘mi no sa’ of ‘pasobra’ ta mas facil pa bisa,pero no mas efectivo. Den e caso aki bo ta wordo bombardia cu un variacion di e mesun pregunta, te ora bo no tin un otro opcion cu ta pa duna e mucha e contesta corecto. (Hasta si esaki kiermen cu bo tin cu uza Google.)
Dicon?
Por tin diferente motibonan di con bo yiu ta puntra asina hopi pregunta. Nos ta pone algun di e motibonan aki bou:
1. E ta sinti e necesidad pa haya sa cosnan: Bo yiu ta crece y ta realisa cu tin hopi bunitesa ta existi den su alrededor cu e no sa nada di nan. Pa un mucha cu no conoce e mundo completo, esaki por ta bastante emocionante. Algun pregunta cu bo yiu lo puntra lo ta dificil pa contesta, pero semper corda cu door di contesta e pregunta (hasta si e ta un dificil) bo ta yudando e desaroyo di bo yiu y su celebro.
2. E kier bo atencion: Segun expertonan, muchanan ta ripiti e preguntanan di ‘di con’ ora nan ta sinti cu nan mayornan no ta compronde nan of cu nan no ta scucha nan. Den e caso aki e ta bon pa duna bo yiu bo atencion completo y papia cu nan. Ora bo duna bo yiu bo atencion, bo por splic’e cu aworaki bo tin cu sigui cu loke bo tabata haci. Cu suerte e lo stop di puntra asina hopi pregunta pa un rato.
3. E ta reta bo: E por ta cu bo yiu aki aya lo no puntra pregunta djis pasobra e ta curioso, pero pa e reta bo un tiki. Dicon mi mester skeiro mi djente? Dicon mi mester bisti mi pañanan? Esaki por ta hopi frustrante – y sigur na fin di un dia largo-, pero rabiando lo haci e situacion pio. Un ‘pasobra mi a bisa’ tampoco no lo haci e situacion miho. Enbes, splica kico ta pasa ora bo no skeiro bo djente of ora bo cana rond riba caya sin paña. Pasenshi y perseverancia ta necesario.
Fuente: https://www.jmouders.nl/de-waarom-fase-waarom-vragen-kinderen-zo-vaak-waarom/
Compila y Adapta door di FPNM
