Oficina Central di Estadistica kier informa e pueblo di Aruba cu entrante diaranson 3 di maart 2021 e Natelling di Censo 2020 lo cuminsa. Esaki ta necesario pasobra ora di Censo ta exigi pa conta tur hende di e pais, e mester ta un conteo di 100%.
Durante e lunanan di october te cu december 2020, un total di 83.713 persona a wordo conta. Di e total aki 51.798 persona a wordo conta door di tellers cu a entrevista personanan den nan hogar y 31.915 persona a yena e cuestionario di Censo 2020 online of via telefon. CBS kier a uza e oportunidad aki pa gradici tur persona cu ya caba a coopera cu Censo2020.
E prome parti di e Natelling di Censo2020 ta start diaranson, 3 di maart 2021. Esaki ta encera cu CBS lo tin 75 tellers riba veld cu lo bishita adresnan cu no a wordo bishita ainda of hendenan cu no tabata na cas ora cu e contadonan a pasa. E conteo aki lo tin un duracion di 2 siman.
CBS ta pidi e cooperacion di e personanan y hogarnan cu no a participa ainda na Censo 2020 pa uza e oportunidad aki pa participa na e Conteo General di Poblacion y Vivienda di Aruba (Censo 2020). Awor mas cu nunca ta di sumo importancia pa haya un bista completo di e desaroyonan cu a tuma luga den nos poblacion pa asina por planifica a base di datonan real y confiabel y a base di situacionnan actual den nos comunidad. Solamente di e manera aki por planifica pa un miho presente y futuro pa nos tur.
Pa cualkier informacion por tuma contacto cu CBS na 524-7433 durante ora di oficina y of por manda un e-mail na [email protected]
