Ora cu e pandemia a cuminsa, Comunidad Hindu a dicidi cu lo yuda. Henter e comunidad a apoya Bharti Daryanani y nan a colecta hopi. Mirando cu esaki lo dura, nan a dicidi di haci esaki tur siman.
Segun Bharti Daryanani, representante di Comunidad Hindu, tur siman nan ta bay na un fundacion, un luga na otro. Pa di dos biaha e comunidad ta acercando Fundacion Pa Nos Comunidad (FPNC). E ta haya cu e fundacion aki ta haciendo un trabou hopi grandi mes y mester di apoyo
Haciendo esaki ta algo necesario y no tin nada di luho. Un biaha mas nan ta purba di haci un tiki mas. Tur ta hendenan di negoshinan cu no a habri ainda, kiermen nan mes no ta hayando hopi fondo pero e tiki cu tin, nan ta duna.
Gianaika van der Biezen, Director di FPNC, a bisa cu esaki tabata un generosidad grandi di e Comunidad Hindu. Esaki ta di dos biaha cu nan a ricibi un bon donacion for di e grupo aki. Mas aplicacion ta drentando, di cual nan por ta hendenan cu a ricibi ayudo di un bisiña of famia.
E Comunidad Hindu a mira e necesidad aki y a contribui cu mas pakete. Den un dia FPNC a reparti rond Aruba 600 pakete y kere cu a kibra e record e siman aki di 1300 pakete reparti. Pa por a parti e cantidad aki di paketenan aki, a conta cu trucknan, Parokia di Brazil y di tin 3 localidad pa busca paketenan. Tur esaki ta danki na comunidad di Aruba, donantenan di chikito te grandi pa yuda alivia famianan den e tempo dificil.
E fundacion tin yen boluntario, pero ta sigui ricibi mas. Asina aki nan tambe por mira kico ta pasa cu nan donacionnan y cu esaki ta bay na famianan cu tin mester. Algo cu FPNC ta para firme p’e ta duna e hobennan chens pa yuda. E idea ta cu e hobennan crece den esaki ya cu nan ta e futuro. Ta siña nan e balornan y normanan di tin compasion, tin e parti humano y duna bek.
