E “Aruba Desk” di Academia di Ley Caribense a habri inscripcion pa e prome curso pa ‘Certified Legislative Lawyer’. Por considera leynan como ‘software’ di un pais. Nan mester wordo actualisa continuamente pa por adresa retonan y crea oportunidadnan nobo a base di leynan moderno, eficiente y efectivo.
Debi na por ehempel e retonan sin precedente di e Corona-virus (‘COVID-19’) ta hopi necesario pa actualisa varios di nos leynan y presenta concepto di leynan nobo. Tur pais den Reino ta rekeri di mas hurista cu experticio pa prepara conceptonan di ley (‘wetgevingscapaciteit’).
Sinembargo tin hopi scarcedad di huristanan cu dicho experticio. Desde aña 2014 caba a inicia esfuersonan pa, a base di cooperacion den Reino Hulandes, por yega na creacion di un Academia di Ley, cu lo concentra pa train mas hurista den dicho experticio. Na aña 2016 a presenta un mocion den Parlamento cu a wordo acepta unanimamente.
E concepto pa por yega na un Academia di Ley a bira un punto central di e maneho presenta pa Minister Andin Bikker den presupuestonan aproba pa Parlamento di Aruba desde 2018 y a trece e tema aki varios biaha den e ‘Justitieel Vierpartijen Overleg’.
Na februari 2020, durante un bishita na Corsou pa apertura di Caribbean Centre for Legislation (‘CCL’), Minister Andin Bikker a introduci e concepto pa creacion di un ‘Aruba Desk’ di e Caribbean Centre for Legislation y asina extende CCL pa por ofrece cursonan na Aruba tambe.
E Caribbean Center di Legislation di Universidad di Corsou ya a inicia cu inscripcion siman pasa. Ayera Minister Bikker a haya aprobacion final di Conseho di Minister di Aruba y hunto cu Aruba Desk di e Caribbean Centre for Legislation y den cooperacion cu Universidad di Aruba, a habri inscripcion pa e prome curso di ‘Certified Legislative Lawyer’.
Debi na e COVID-19 e cursonan lo wordo duna pa medio di ‘distance learning’ cu uzo di e.o. video conferencing. E idea ta pa por inicia e aña aki cu training di como 15 Certified Legislative lawyer. Den cuadro di e Aruba Desk di Caribbean Centre for Legislation, ademas tin plania pa den futuro cercano ofrece cursonan special (‘tailor-made’) pa por ehempel Parlamento, departamentonan di Gobierno y sector priva.
Loading…
Reload document 
Open in new tab 
