E di dos parti di e caso Kininiki, portofon di Polis cu a cay den man di prensa, a sigui na november ultimo y na inicio di e luna aki. Sinembargo un decision di loke ta e castigonan, lo tuma luga fin di luna.
A pone e fecha di 22 di november pa cuminsa cu tratamento di e di dos parti unda mester a presenta e periodista R.T., su ruman L.T. y e Polis Murray. Sinembargo caso di e rumannan T. so a sigui, mientras cu tratamento di Polis Murray a wordo poni pa dia 9 di januari ultimo.
Rumannan T. tabata sospecha di a cumpra e agente policial pa por haya informacion di sucesonan cu ta tuma luga. Esaki via di un radio di polis unda cu ta scucha tur informacion.
Na e ocasion ey a papia di con e investigacion aki a cuminsa, ora cu supuestamente, segun e fiscal, a sinta falta di radionan di polis cu cierto miembronan di prensa lo tin. Den e prome acusadonan cu a bini dilanti, Nelson Speed Andrade y Marko Espinoza, hasta a menciona cu ta un funcionario policial a haya tip for di un miembro di prensa. Pues tin por nota cu tin poco informacion contradictorio.
Fiscal a trece un biaha mas hopi dato di e prome caso y a papia cu Polisnan mester ta integro y no mester laga su mes wordo cumpra. En general na e ocasion ey a haya e impresion cu Fiscal no ta di acuerdo ni cu e forma cu un grupo di prensa ta haya nan informacion pero tampoco con ta presenta esaki.
A condena cu a ofrece placa na Polis Murray pa haya radio y cu a haya 4 portofon di Polis na cas di e periodista T. Tabatin tapmento di telefon unda cu a mustra cu ta papia di pago, segun e Fiscal a bisa dia di e tratamento.
Loke cu a pidi pa e dos rumannan T. tabata similar na e demanda y castigo imponi pa Andrade y Espinoza. Nada cu nan mester bay cera bek, pero toch un tiki mas pisa pasobra ta papia di cumpra Polis.
Pa R.T. a xigi 186 dia di cual 18 dia ta condicional y 3 aña di prueba; 240 ora di trabou pa comunidad of 120 dia cera. Pa luigi cu su rol ta menos a pidi 180 ora di trabou pa comunidad of 90 dia cera.
Abogado a papia di e sistema na Hulanda, unda cu Polis ta bati alarma na prensa ora cu tin casonan grandi.
E caso di e funcionario policial a tuma luga e siman aki.
Ministerio Publico a acuse di malversa radio di polis den e periodo di november 2016 pa november 2017. E asina yama radionan Tetra, cu su señalnan no por wordo captura riba scannernan.
Fiscal a pone hopi enfasis riba e rol cu Murray a hunga den e caso aki, cu el a haci posibel cu e rumannan T. por a scucha e noticianan di polis. Den caso di e Polis Ministerio Publico a pidi un castigo di 240 ora di trabou pa comunidad, of 120 dia cera. A exigi 6 luna di prizon pero condicional y cu 2 aña di prueba. Dia 29 di januari pa 2’or di merdia tin uitspraak.
