Diahuebs Mediador di Gobierno a sinta na mesa cu delegacion di CITGO Aruba, sindicato FTA y Gobierno relaciona cu e preocupacion existente cu traspaso di e refineria pa Aruba. Federacion di Trahadonan di Aruba (FTA) kier claridad kende ta bay tuma e terminal di combustibel y Departamento Marino over y cuanto di e empleadonan ta keda y cuanto ta bay.
No por t’asina cu ta manda tur hende cas, siendo cu e dos facilidadnan ey mester keda funciona sino Aruba no ta haya combustibel.
Den tur e problema aki a busca ayudo di Mediador di Gobierno Anselmo Pontilius, cu mesora a yama e partidonan na mesa. Pontilius a splica cu na fin di aña caba tabata consciente di e problema existente. Y cu tabatin menasa cu lo escala e situacion si no haya mehoracion di e pakete cu a keda ofreci na e mas di 70 trahadonan cu tin eyden. CITGO a tempo ey a dicidi cu lo pasa operacion pa Gobierno.
Pero ni FTA ni Independent Oil Workers Union Aruba (IOWUA) a acepta a ofrece e oferta, y como cu CITGO no a cambia su posicion, un gran cantidad di trahado a dicidi di bay den protesta. E momento ey e obligacion di Mediador tabata pa yama e partidonan na mesa. Esey a sosode diahuebs unda a sinta basta largo na mesa tratando di yega na un solucion permanente.
Mediador a enfatisa cu den e caso aki no ta placa so ta e punto di discusion. Tin e situacion unda sindicato ta demanda un pago igual cu otro coleganan a haya den pasado, na januari y februari 2019. Pero CITGO ta bisa cu nan no ta den situacion pa duna e mesun tipo di pago pero cu si lo cumpli cu loke ta stipula pa ley. Esaki ta un di e diferencianan di opinion grandi cu tin riba mesa. E reunion a finalisa diahuebs sin cu a logra yega na un solucion.
Pa loke ta e di dos punto, Mediador a recorda cu e ley cu Aruba a pasa na 2013 ta exigi e dunado di trabou cu ta sali di e operacion cu e ta aden, ta obliga pa informa e trahadonan kico ta nan futuro y cu ken. RDA y Gobierno ta sinta na mesa cu CITGO pa tuma over e operacionnan. Pero aki tambe tin un debate legal pasobra e sindicato ta exigi pa sa cuanto persona ta keda traha y bou di cual condicionnan. Pa sali di esaki, a pone cu RDA y su Hunta di Comisario ta bay reuni cu e sindicatonan, diahuebs y diabierna, pa clarifica e punto aki. Si logra esey, lo resolve parcialmente e problemanan existente pero ta keda e parti di pago.
CITGO ta keda insisti riba e pago cu nan a ofrece y a duna te cu dia 10, esta awe, pa acept’e. Pero no ta bisa kico lo pasa si no acepte. E procedura ta cu si no yega na un acuerdo, e doño di trabou por bay Departamento di Labor pidiendo permiso pa termina cu e relacion di trabou of por bay Corte y pidi Hues “ontbinding”. E ta un proceso cu tin un caminda legal pa cana. Mediador di Gobierno ta kere cu miho ta pa e partidonan yega na un acuerdo na mesa. E punto principal ta con ta bay mantene mas hende na trabou y bou di ki condicionnan.
