Despues di cinco siman di competencia den e bueltanan eliminatorio, diadomingo awo lo tin e finalnan di “Copa Luis Swaen” 50 y 60 plus organisa pa SV Aruba Juniors.
Den e prome buelta e teamnan a wordo parti den poolnan unda cu despues di algun duelo formal a saca e finalistanan. Den e division 60 plus Aruba Juniors cu 3 gana y 0 perdi y Benjamin Tigers cu 2 gana y 1 perdi a clasifica pa e gran final 60 plus. Despues di un bataya fuerte entre e teamnan di 50 plus, Survival, Kibaima y Surprise ta clasifica direct pa e semi finalnan mientras cu Aruba Juniors ta clasifica como e mihor segundo luga. Den e prome wega di semifinal Survival ta gana di Kibaima cu score di 9-0 pa bira e prome finalista. Mester menciona cu ta prome biaha cu Survival ta participa den torneo Luis Swaen. Den e di dos wega di semifinal Surprise no tabatin problema pa gana Aruba Juniors. Mediante Knock out Surprise ta gana 16-6.
Diadomingo awor e torneo ta clasura ora cu pa 9:30 di mainta den liga 60 plus Ildo’s Lottery ta enfrenta Bambino’s sigui pa Astros contra Deco’s den Liga 50 plus. Ambos ta wega amistoso. Cuminsando pa 12:30 lo tin e prome final di e dia unda cu Aruba Juniors lo enfrenta Benjamin Tigers. Ban wak si Aruba Juniors ta mantene su racha di gana torneo e aña aki. Despues ta sigi e gran final den liga 50 cu Surprise enfrentando Survival. Espectativa ta halto pa e wega aki mirando cu Survival maneha pa Oslin Kelly, ta conta cu hungadornan experiencia manera Franklin Danies y Nelson Orman entre otro. Di otro banda Surprise tin hungadornan cu hopi poder manera Tula van Heyningen y Nun Flanegin.
E team ganador di Liga 50 ta clasifica direct pa e Torneo Internacional 18 di maart 2019 cual ta cuminsa dia 10 di maart 2019. E ultimo wega di diadomingo awo lo ta entre Survival 40 y Quisquella. Tur fanatico di softball ta invita pa bin Aruba Juniors diadomingo awo pa mira e gran final di Liga 50 y 60 plus. Manera custumber lo tin un bar y cushina bon surti. Nos ta topa na Club Aruba Juniors
