Un biaha mas Stichting Monumentenfonds Aruba, Santa Rosa, Fundacion Museo Arubano y Departamento di Cultura Aruba ta uni pa celebra nos cultura y casnan di cunucu na e Fiesta di Cunucu.
Esaki lo bira e di cinco edicion di e proyecto aki cu a cuminsa na 2014 cu e idea pa rebiba casnan di cunucu no habita, muebla esakinan y celebra nos cultura cu baile, musica, cuminda y productonan tipico di Aruba. Na e momento cu nos a aserca e partnersnan mesora tur a bay deacuerdo y asina nos a organisa e prome fiesta di cunucu na Tanki Leendert.
Nos ta hopi satisfecho cu e resultado di e ultimo cuater fiestanan Na Tanki Leendert, Brasil , Koyari y awor nos ta un biaha mas den e districto di Noord pa e di cinco edicion.
Despues di un buskeda intensivo nos a logra haña un bunita cas di cunucu no habita pero cu e rastronan di dje ta recorda nos con fuerte nan ta para despues di tanto aña y ta simbolisa e esfuerso di nos grandinan pa construi un dak pa nan famia.
E cas di cunucu e aña aki ta di Famia Britten y ta keda na Calabas 71. Un biaha mas nos lo muebla e cas danki na e colaboracion di Fundacion Museo Arubano pa asina e publico por haña un impression con e hendenan Tabata biba antes y tambe haña splicacion di un colaborador di e museo tocante e piesanan di e coleccion di community museum.
Santa Rosa lo organisa nan popular Mercado. Departamento di Cultura ta encarga cu e programa cultural cual lo ta uno hopi varia incluyendo cah’i orgel, steelband, gruponan di baile, cancionan tipico di Aruba y mas. Tambe e popular wantomba lo tei pa saluda un y tur cu bishita e evento.
Nos kier invita henter e comunidad di Aruba pa bishita nos Fiesta di Cunucu diadomingo 9 di September 2018 di 10:00 pa 15:00 y asina siña un tiki mas y disfruta di nos cultura!
