Awe tardi Aruba Airport Authority a tene e “Official Financial Close Ceremony” pa e proyecto Gateway 2030. Ta trata aki di e fiansa mas grandi cu a yega di haci den historia di nos Aeropuerto. Cu e suma di placa aki disponibel, lo renoba y amplia e facilidadnan na Aeropuerto Internacional Prinses Beatrix.
Aruba Airport Authority a uza un compania local Finance Quest pa yega na e fondonan necesario. E grupo aki, cu ta ex empleadonan di AIB-Bank, a logra alcansa e suma di 495 miyon florin a traves di 12 diferente instituto financiero, tanto local mes como tambe internacional.
E proyecto Gateway 2030 ta encera reconstruccion y expansion pa por maneha e fluho creciente di pasahero y facilita nan experiencia di biahe y na mesun momento opera na un manera mas efectivo y sostenibel.
“E lo crea mas di 400 cupo di trabou pa nos hendenan, e lo stimula nos economia, contribui na nos GDP y contribui na finanzas di Gobierno di Aruba”, asina Minister di Turismo, Salubridad Publico y Deporte, Dangui Oduber, a bisa awe tardi despues di e ceremonia.
