Representantenan di Festival di Tumba di Corsou, tabata na Aruba pa asina invita nos hendenan pa bin presencia e festival grandi aki.
Manfred “Feco” Gomes a conta cu nan ta trahando duro pa e di 49 edicion di e Festival di Tumba y ta priminti un espectaculo grandi. Aña pasa, tabata tin un cantidad di Arubiano presente, mas tanto cu otro añanan. E hecho cu Buleria tabata den e festival tambe a yuda.
Pero pa motibo cu e conexion aereo no tabata 100%, algun no por a yega. Pero awo cu tin mas aerolinea ta bulanto entre e islanan, ta spera mas Arubiano ainda.
E tumba e aña aki lo ta hopi interesante. Si mira e participacion cu ta na caminda, tin e tumbero cu tin 22 aña sin participa, manera Juni Juliet, cu e biaha aki ta aden.
No mester sconde cu Corsou tambe, cu e parti economico, pa motibo di e mercado Venezolano tambe ta pasando den su momento dificil. Ta pesey tambe ta busca un solucion.
E aña aki a haya algun partner menos, aunke cu tin cu warda algun confirmacion. Mesora a busca un alternativa. Pa mundo henter, lo bende e cuater dianan via di Cariflex. Esey tambe por genera entrada.
Na Hulanda ta hay’e. Na Aruba tin convenio caba. Pa tur hende na mundo cu kier e pakete pa 4 dia, e ta bay PPV. Na Hulanda bo no por haya cuater anochi en vivo imagen. Bo ta haya e final so.
Esey ta genera suficiente entrada cu por cubri e gastonan halto di produccion cu ta riba 300 mil florin cu antes tabata wordo cubri pa TDS y e organisacion mes.
Awor aki e organisacion mes ta carge. Expectativanan ta hopi bon mes y diadomingo lo ta e inscripcion.
Na Corsou Tumba ta grandi. Ta spera mas of menos 65 cantante. Nan no kier demasiado tampoco. E cantidad aki ta bon pa parti den e dianan preliminar y pa diabierna, maximo 30 por bay final. Pero e musiconan ta participa. E bandanan tambe ta hinca hopi esfuerso, cu supladonan profesional di exterior. Tin un convenio cu minister cu durante carnaval, profesionalnan por drenta y traha na Corsou. Asina ta poniendo e punto riba e partinan di organisacion final. Diahuebs proximo na Corsou lo bay presenta tur e branding partnernan y diadomingo lo bira un fiesta, caminda tur branding partner ta haci promocion di nan producto. Esaki ta entre 2’or y 6’or. Pa 7’or lo anuncia kendenan ta esnan cu lo participa. Y di 7’or pa 9’or lo bay tin musica en bibo.
Ya caba tin hende a cumpra carchi online pa Festival di Tumba. Tin tambe Funmiles cu ta bendiendo na Aruba.
Aña pasa tabata tin por lo menos 600 Arubiano na Corsou. Ta hopi gradicido y ta kere cu te hasta algun mandatario ta wordo invita pa tey presente pa gosa di e Tumba di Corsou.
Segun Gomes, Buleria sigur lo bay tey presente un biaha mas, hunto cu Rocco, kende ta bezig ta score den e ultimo añanan. E rey di tumba lo bay defende su corona cu Buleria. Fuera nan tin dos cantante mas di Aruba cu lo bin participa.
Un cos ta den e ultimo añanan, hopi hoben a bin penetra y score halto. Esey ta duna un garantia cu bo festival ta sigui existi. Pa e parti di e musiconan, e organisacion ta take care di esey. Tin hopi musico hoben ta toca den diferente banda y na un nivel hopi halto.
Tin diferente Arubiano cu pa hopi aña ta bin Corsou den grupo pa e Festival di tumba. Ta spera nan atrobe. Nan mes lo transmiti e mensahe con bon nan a pasa con e ambiente ta y con nan a gosa.
Bin apoya e representantenan di Aruba tambe, pero igualmente e resto di e participantenan di Corsou. Bon bini dia 4, 5, 6 y 8 di Februari, den Curacao Festival Center, pa e Festival di Tumba 2019.
Oficina di turismo di Corsou
Janine de Windt, representante di Oficina di Turismo di Corsou, tabata tey presente durante e presentacion di Festival di Tumba di Corsou. El a splica cu nan a bin uni, cu nan no ta bay cada un riba nan mes. Nan tin un Festival di Tumba, pero tambe nan ta promove e carnaval diamars anochi, hunto cu e grupo Soy’e y hunto cu Champagne. Carnaval na Corsou ta casi mesun cos cu Aruba, pero solamente nan tin un dia mas extra. Nan festival di Tumba ta hopi apart.
No solamente riba dia di inscripcion, cu ta henter un happening, of despues, riba e di tres dia di e festival, kendenan ta bay e anochi final, tur hende tin di bay polish nan tumbanan, pa e diabierna anochi bin y crea un ambiente cu na Corsou so nan por tin’e. Tur biaha bo por pone un propaganda, un comercial, pero ta bon pa ora cu tur hende uni y bay Corsou. A pone tur cos hunto y bin Aruba pa asina informa e pueblo di Aruba.
