Edwin Tromp ta director tecnico comercial di FCCA y e ta conta riba cierto asunto di casnan di pueblo. Mas cu un luna pasa tabata tin un conferencia di prensa riba esaki. Tin un demanda pa casnan di pueblo. Tromp a comenta cu e prome parti ta cu FCCA a lanta na 1979, dia 13 di Februari. Su mision ta pa traha cas cu ta pagabel y tambe pa comunidad y tambe casnan cu nan ta huur, cu tambe mester ta pagabel pa hendenan cu tin necesidad di esey.
Nan a haci diferente proyecto, manera cu ta conoci na Aruba. Pero cada tempo tin cu revisa si con ta bayendo. Un di e cosnan cu Aruba a conoce prome cu FCCA mes, ta cu a traha cas na cantidad basta grandi hunto. FCCA tambe a haci esey. Tin cas na Bushiri, tin na Sero Patrishi, tin na Sabana Basora, tin na Cura Cabay Zuid y asina por sigui menciona. Por bisa si awo cu esey ta un manera of un sistema cu a haci, cu definitivamente no por sigui haci’e. Casnan di pueblo tambe ta trece nan retonan cu nan, vooral ora cu ta cantidadnan mas grandi.
Reto
Tromp a splica cu e retonan ta social, loke ta conoci awe den e diferente barionan. Esey no ta nifica cu no por deal cu nan. Tin diferente instancia y FCCA tambe tin su hendenan cu ta bishita tur e casnan cu nan ta huur y ta papia cu e hendenan, puntranan con ta bayendo, kico ta pasando, kico tin mester. Obviamente tin cu mantene nan tambe.
E cantidad awe te ainda ta conoci cu tin un demanda di riba 2000 cas di pueblo. Tromp a agrega cu ultimamente a haci un inventarisacion riba esaki aña pasa, y a sali afo cu keto bay tin hende interesa. Tambe tin un parti cu ta sigur un 10% cu ta interesa mas pa cumpra un cas.
Awendia nos ta na proyectonan na Kiviti na San Nicolas. A traha cas pa hendenan mas grandi. A traha un set na Paradera basta tempo caba. Awo uno ta biniendo cla na Cunucu Abao, cual ta 18 cas y na Savaneta tin 28 cas.
Ki tempo
Den 2017 a cuminsa cu e proyectonan aki. Tin cu a cuminsa na final di 2016. Awor aki tambe na Santa Cruz a cuminsa cu un edificio cu ta bay ta ubica 7 pa 8 apartamento. E ta keda patras di MFA na Santa Cruz y esey ta un tereno cu a haya di gobierno pa desaroy’e y esey ta haciendo actualmente.
Tin plannan pa haci dos edificio di tres piso na Isaac Wagemakerstraat na e skina hunto cu Weg Sero Preto. Esey si no a cuminsa ainda. Tin e tereno si. Pero ta bezig cu un compania pa haci’e un pre-fab system. Ta bezig cu e plannan y tambe tin cu haya OK di DOW. Tin cu haya bouwvergunning, Tromp a splica.
Fuera di esey tin idea e aña aki, pa por traha e mesun sistema. Tin tereno na Tanki Leendert, tin tereno na Hato y otro camindanan mas.
Obviamente tin proyectonan tambe cu ta pa construi cas. Hendenan ta cumpra tereno y construi cas. Tin un proyecto masha nechi tras di warda di polis na Noord esta na Shaba. E ta ubica mas of menos 50 lot pa bende cu e clase medio bay abao. Tur hende ta papia di clase medio bay ariba. Tin e clase social medio bay abao, cu no ta social, pero nan tambe ta un parti cu ta busca di cumpra nan propio cas.
