For di den oranan di atardi dos yiu menor di edad, hunto cu famia y amigonan para na porta di Warda Costa sperando pa nan ser keri haya su libertad. Te oranan laat di anochi esaki no a sosode pa motibo cu directora di Warda Nos Costa Trudy Hassell ta exigi pa entrega paspoort di e ciudadano aki.
Abogado Jeanice Schepers tabata presente na e base di WNC pa acumula informacion. Segun el a splica, su cliente a keda deteni, pasobra segun nan ta bisa e ta ilegal. Na e momentonan ey ya caba e tabatin un peticion pa asilo entrega. Diabierna ultimo Corte a evalua e procedura di su detencion y den oranan di merdia Corte a anuncia cu su detencion tabata illegal.
Loke cu ta haya straño den e caso aki ta cu sra. Hassell ta exigiendo pa cumpli cu algun condicion extra siendo cu, segun e Abogado, si Corte a dicta cu e persona su detencion tabata ilegal, mester lague mesora liber. “Pues e ta deteni ainda.” Ta den discusion e condicionnan extra cu e kier pone. Hasta Polis a bini pa papia cu sra. Hassell pa interveni y lague cumpli cu e decision, sinembargo despues di mey ora e Polisnan no a logra convence directora di WNC pa respeta decision di Corte. Esaki tabata pa 10.30 di anochi.
Famia a cuestiona e hecho con a alarga e proceso pa firma libertad di nan familiar. Cada biaha tabata busca un otro aspecto cu mester warda pa tuma luga. “Tabata parce cu e no kier respeta e decision di Corte,” un miembro di famia eybou, kende no kier pa su nomber wordo menciona, a bisa. Despues cu Corte a ordena su libertad, e dos yiunan menor di edad a acudi cu un bouquet sperando di por brasa nan mama despues di seis dia di ta “ausente” for di nan. “Mi ta sinti hopi falta di mama,” e chikito a bisa bo yoramento y cu e bouquet di flor den man.
Un grupo basta grandi a reuni na e sitio despues cu a bira conoci cu Hassell ta poniendo obstaculo pa e señora haya su libertad. “Esaki ta nada otro cu un abuso,” e señora Yosaira cu a para garantia a duna di conoce. Casi den oranan di anochi Trudy Hassell a bin pafo y yam’e pa dun’e algun informacion. No a permitie drenta cu ningun otro hende mas y hasta a orden’e laga su tas pafo.
Paden el a haya un splicacion di e procedura, pero como cu no a permitie drenta cu ningun persona, no tin testigo di loke a bis’e paden.
A entrega un copia di e paspoort pero no a acepta esaki pasobra ta exigi pa entrega e documento di estado Venezolano.
Na final di anochi e señora no a wordo laga den libertad y Abogado ta evalua pa den oranan di mainta cuminsa un caso sumario.
