Famia Planea ta existiendo ya 49 aña, educando y informando e hoben y tambe adulto. Eynan por duna tur guia y informacion. Ghislainne Koeiman, Support Staff den e parti di comunicacion, educacion y informacion, tin un aña den servicio di Famia Planea. E ta encera cu e ta yuda e hobennan cu ta yega eynan. E ta duna informacion di e productonan cu Famia Planea ta ofrece.
Tambe Koeiman tin na su encargo e parti di delivery service, cu ta un di e servicionan mas nobo di Famia Planea.
E interes di e hobennan
Koeiman ta hopi satisfecho con tur cos ta bayendo y con e crecemento dia pa dia ta bay. E interes di e hobennan ta keda grandi y esey por ripara tur dia, mirando e flow cu tin na Famia Planea. Tambe loke ta e parti di service di deliver, door cu e ta basta nobo, hopi hende no sa di dje ainda, pero tur dia ta ripara cu e ta creciendo y mas hoben ta haciendo uzo di dje. Nan ta consciente tambe con facil ta pa si acaso nan no por yega na Famia Planea, cu nan si por yega te unda cu e hobennan ta,
No tin un limite, segun Koeiman. Famia Planea t’ey pa yuda. Si e hoben no por yega, nan si por yega. Tin delivery cu ta pasa te na De Vuyst. Tin delivery cu ta casi yega Lighthouse. Pa famia Planea no tin un limite.
Kico pa Famia Planea ta importante
Loke ta importante pa Famia Planea ta, pa e hobennan sigui haya su productonan. Y e ta keda haci uzo di nan. Pa un tempo toch basta largo, semper ta tende cu nan no por a yega pasobra no tabata tin transporte. E mama su auto a daña, bus a bay laga e hoben. Awo cu Famia Planea por yega cerca nan, ta hopi mas facil.
Famia Planea ta haya hopi feedback, ta cosnan cu nan ta traha tur dia cu nan y pa asina keda adapta nan trabao pa mira ki approach nan por haci pa asina keda duna informacion, keda conscientisa y no ta solamente e hobennan mester yuda conscientisa, pero sigur e mayor y educadornan tambe, pa asina nan ta na al tanto di e cosnan cu ta pasando.
E cantidad di clientenan di FP
Koeiman ta sigui splica cu te cu awor aki nan cantidad mas grandi ta hoben. Nan tin e parti di hoben cu ta bira adulto y cu ta keda miembro y tin e parti di adulto cu ta dicidi cu nan ta stop di uza producto, pero nan ta recomenda e hoben rond di nan pa bira miembro y asina cuminsa cuida nan curpa.
Mensahe
Den e temponan aki unda cu tecnologia a cuminsa tuma over hopi cos, facilmente un hoben ta subi Google y haya informacion. Pero mester ta alerta tambe cu no ta tur cos cu haya online ta e informacion corecto. P’esey ta hopi importante pa nan sa cu FP t’ey, cu ta existi ya 49 aña y sigur e ta hopi facil pa yega eynan. Si nan no por yega, no ta problema. Tin e online counseling tambe. Cualkier pregunta of duda, por haci uzo di e plataforma aki. Manda e pregunta cu tin y cu mil amor nan ta contesta esakinan.
Mester cuminsa conscientisa e hobennan for di tempran. E no ta un tabu mas, e no mester keda scondi. E mester ta eynan pa asina tur hoben yega na informacion corecto.
Mayor y yiu
Mas y mas ta biniendo dilanti cu e mayor ta bin cu su yiu, sea mama cu yiu, of tata cu yiu y hasta e combinacion di mama, tata, wela y e yiu, pa asina haya tur informacion, kita duda y preguntanan cu por tin. Asina hunto pa yega na un combersacion.
Scol
Scol ta bayendo hopi bon. Mas y mas scol ta acerca FP for di lunanan adelanta pa por reserva fecha. Diferente scol ta bezig cu e carouselnan tambe. Nan ta acerca FP pa ta parti di dje. Tin scolnan cu asina cu e aña escolar cera, ya nan ta prepara un calender nobo, pa asina hinca FP den esaki. E reaccion ta hopi positivo pa loke ta scol.
Edad
E por bay zona alarmante, pero tin caso di hobennan di 11 aña cu ya ta sexualmente activo. Tin scolnan cu ta consciente di esaki. Tin scolnan cu hasta ta pidi FP pa no solamente duna charla den 6de klas, pero pa cuminsa den 5de y hasta scolnan cu ta pidi pa duna charla den 4de klas. Claro ta duna e charlanan adapta na cada edad.
Koeiman a sigui splica cu e hobennan di 11, ainda no a caba di crece completamente. FP no ta ken pa bisa ni husga, pero si e ta mas consciente ora cu e ta na edad di caba cu un scol, ora cu ta full prepara pa cualkier consecuencia cu bin cu e acto sexual aki.
Ki ora e hoben por bin
Presidente di Famia Planea (FP), Evelyn Ras-Yarzagaray, a splica cu ta bon pa subraya cu nan ta traha a base di e reglanan di UNFPA, cu WHO y PAHO. Ta tene cuenta hopi cu e derechonan humano y tambe derechonan sexual di cada persona. Ki ora nan por atende y bin FP, ta depende di ki servicio nan ta desea. Tin servicionan tambe pa muchanan cu ta bezig cu proyectonan di scol. Hopi biaha pa diferente material, sea cu ta na scol basico of secundario, ta traha cu diferente tema, diferente topico, cu por guia nan. Hopi biaha nan ta haya informacion na scol. Esey no kiermen directamente cu e ta un estimulo pa bo ta sexualmente activo.
Ta informacion pa bo tin den bo cabes pa unabes pa bo dicidi pa ta sexualmente activo, bo sa unda bo lo por haya guia, informacion, pa esaki. Hopi biaha, ora cu tin hobennan cu ta haya informacion, tayer di FP cu ya ta sexualmente activo caba, ta ripara esakinan tambe di biaha, pasobra nan ta bishita FP e mesun dia, e mesun siman, p’asina nan por bira miembro, pa asina nan por haya informacion one-on-one.
Loke ta pidi e cliente, si bo ta bao di 21 aña, pa trece bo carchi di AZV, pa asina haya e servicio y producto completamente gratis. Si bo escogencia ta di productonan manera un hangua, un spiraal, e ora esaki si ta rekeri un receta di dokter di cas. Ta conseha e ora pa bay dokter di cas, p’a asina por papi’e y tur e aspectonan aki ta importante, pasobra e historia medico tambe ta hopi importante den e parti aki.
Unabes cu tin esaki pa prome biaha, e ora FP ta sigui guia nan door di e proceso cu e producto, hunto cu counseling. Ta haci esaki conhuntamente cu e dokter di cas. Asina facil e ta pa un hoben por drenta y bira miembro cerca FP.
Tambe si bo no kier bira miembro, bo no kier haci uzo di cualkier metodo anticonceptivo, bo por solamente bin haci afspraak pa un proyecto di scol of bo ta curioso pa cierto informacionnan, bo por pasa libremente, of bo por yama.
Cu e servicionan nobo di FP, ta enfoca pa yega mas cerca di e cliente. E dos servicionan nobo cu FP tin ta maraviyoso cual ta online counseling cu ta 24 ora pa dia y tambe tin e servicio di online store. Na dje ta mara e delivery service tambe. Esey ta nifica cu unda cu bo ta, bo por bay riba bo telefon, laptop, iPad y shop pa cualkier producto cu bo ta desea di FP, y ta deliver esaki te na unda cu bo ta. Sea bo ta na cas, na trabao, bo no por sali merdia, bo ta na scol, FP ta percura pa bo haya e producto. E ta haci’e hopi mas facil y accesibel. Asina FP ta mas mobil y haci’e mas facil. Un aspecto cu ta lantando cabes, ta e aspecto turistico. Si nan ta desea esaki, ta un rato nan a core ordo nan producto y asina ta bay entrega esaki unda cu nan ta.
FP ta purba di cater mas hopi hende cu ta posibel, den e area di salud sexual reproductivo cu tur e productonan cu nan ta brinda y ofrece.
Sorpesa
Prome cu e aña cera, FP ta bay tin un sorpresa pa e comunidad di Aruba. FP a bin a cambiando diferente aspecto di FP y un di nan ta e cara con e comunidad ta wak nan. FP a pasa den un transformacion y nan ta hopi mas den un aspecto corporativo, yudando clientenan den un toke hopi mas personal, hopi mas profesional. E staff ta relativamente nobo. Nan ta hopi dinamico, innovativo, cu specializacionnan riba e salud sexual reproductivo y trahando tambe hopi mas cerca cu tur e dokternan di cas p’asina por brinda e pashent un miho experiencia encuanto e servicio cu ta desea di FB riba e salud sexual reproductivo.
FP ta sumamente contento y lo bay ofrece e comunidad di Aruba y mustra nan kico FP por ofrece nan prome cu e aña bolter. Den 2020, FP ta celebrando su di 50 aniversario, cu ta existi na Aruba. E ora ta bay enfoca un poco mas riba e aspecto di modernisacion. Ta bayendo over di biaha riba e aspecto di digitalisacion pa e scolnan.
FP ta contento y sumamente entusiasma pa e momento aki yega. Trahando cu un grupo meta cu ta tira y share cu e hobennan, ta pushabo pa bo keda innova y keda pensa con bo por brinda nan lo miho den informacion en particular y con bo por atende miho cu nan, segun nan exigencianan y segun loke ta fit nan miho. FP ta sumamente contento pa e transicion aki di 2019 pa 2020. Segun Ras, FP tin hopi pa bay ofrece comunidad y ta spera cu lo por bay haci mas y mas uzo di e servicio y productonan cu FP ta ofrece.
E clientela di FP a subi substancialmente, di cual nan ta hopi contento. Nan tin un crecemento di rond di 15% y esaki ta bin tambe door di e enfoke riba e aspecto di e scolnan. FP tin e curriculum di nan mes cu nan ta uzando y ta aplica, cu ta bin un tiki di diferente partner cu nan ta traha cun’e, no solamente analisando nan contexto na Aruba, e cultura, norma y balor, pero tambe ta traha cu organisacionnan internacional manera Rutgers di Hulanda cu na su luga ta cay bao di IPPF (International Planned Parenthood Federation), cu ta un federacion cu 173 pais ta afilia na dje y Aruba tambe. Nan ta e weso di lomba di informacionnan cu FP ta haya di documentonan, investigacionnan cu ta haci y specificamente loke cu FP ta enfocando riba dje ultimo añanan, ta e parti di educacion. Educacion, guia, informacion. Ta ripara cu e strategia ey ta trahando hopi bon pa e clientenan, specialmente pa e hobennan, Ras a splica.
