Famia na pena: Elmar no ta haciendo nada pa remedia storing na cas

3833

Ya pa algun siman largo, famia Paneflek ta experienciando problema di coriente na nan cas, cu e consecuencia cu varios aparato electronico y hasta cuminda ta daña pa e mesun motibo aki.

Y no ta pasobra nan no ta na altura. For di basta tempo caba famia Paneflek na Noord Cura Cabay, ta bibando den un situacion cu casi no ta humano.

Por a tuma nota di coriente cu ta bay bin, mescos cu ta un discotek tin den cura. Cabes di famia, Arthur Paneflek ta conta cu el a yama hendenan di Elmar na storingsdienst.

Aparentemente nan no tin hende tampoco, loke ta straña hopi, pa haci puntmeting. A haci puntmeting caba na un palo di luz dilanti di e cas un biaha y e puntmeting haci, a duna resultado un biaha di 112, 117 y 123.

Esey ta nifica cu e no ta coriendo normal pa cada fase. Y nan sa e cosnan aki masha bon. Porkerianan cu nan tin den bario, tin cu ta drecha pa hende decente of hende por biba un manera decente y evita problema.

Aparato awendia ta basta caro. Bo ta traha, bo tin bo frigidaire, bo wasmashin. Nos tur ta paga coriente, segun Paneflek. Aunke cu tin solar panel, despues cu solo baha, ta for di Elmar e tin cu haya coriente.

Storing di ELMAR perhudicando ciudadano

Posted by 24ora on Monday, September 21, 2020

E ta conta cu esaki ta di dos biaha cu e tin e coriente aki cu coriente ta snoek tur su aparatonan cu e consecuencia cu e tin cu saca tur e plugnan di washmachine, frigidaire cu tur e consecuencianan.

Paneflek ta bay trabao y tin cu corda cu e tin cu saca plug. E ta snoek e compressor di e frigidaire y esey por kim’e.

E ta splica cu solar panel ta yuda Elmar mes, pero di un otro banda anochi e no por sinta trankil wak television, pasobra e coriente ta snoek’e.

E cos aki ta fastioso. Paneflek a papia, pero no tin comunicacion cu e departamento. E comunicacion no ta normal. Despues di tres dia nan a pone un grabacion y e meta di e grabacion ta pa wak unda tin iregularidad riba e red.

Ta aplaudi esey si, pero mester ta serio. Si bisa cu ta resolve e problema awe y si no por resolv’e, ta yama Arthur Paneflek y bis’e cu e no por a resolve e problema y e ora ey, Paneflek lo wak con e ta deal cu su comestiblesnan cu ta dañando den freezer.

Awo ken ta bay paga su comestiblesnan? E tin un wasmachine cu a daña, ken ta bay pag’e. Esey ta e dilema cu famia Paneflek ta pasando aden.