Trahadonan di Eagle Resort, Eagle Casino y e division di accounting tin un referendum na Mediador di Gobierno, unda cu nan kier tin un sindicato pa representa nan. Nan a acerca Federacion di Trahadonan di Aruba (F.T.A.) y p’esey a bay na un referendum.
E directiva di Eagle Resort a sinta cu e trahadonan y a kere cu tur cos ta palabra. Pero e directiva a manda Mediador corte, pero hues a bisa cu e referendum mester sigui. Segun Jose Figaroa, hurista di F.T.A., pa basta tempo nan no a haya tipo di situacion asina aki. Algun aña pasa tabatin par di caso y e tempo ey mediador tabata duna casonan pa parti, seccion den un compania, departamento den un compania.
Dunadonan di trabou tabata cuminsa cu casonan pa purba para nan. Den e caso aki ta diferente y a crea expectativanan. E no ta algo inunsual. Figaroa a bisa cu dunadonan di trabou ta bira nervioso, tin miedo pa un sindicato drenta e compania. Pa loke ta e sindicato no ta mira necesidad den esey, pero si ta maneha e compania den forma corecto, ta trata e trahadonan den un forma bon, un sindicato unico cos lo haci ta controla cu tur cos ta cana nechi. Tambe lo pone cierto palabracionnan riba papel, pero e intencion di sindicato no ta pa yega y kibra niun compania, ni haci daño. E sindicato t’ey pa proteha e posicion legal di trahado na momento cu e ta labora.
Tur caminda tin hopi problema y no ta prepara p’e crisis aki. E sindicato ta representa 60% di diferente compania. E keho ta hopi, pero loke e sindicato ta haciendo ta purbando di yega na un acuerdo temporario cu e compania. Ta compronde cu companianan mester poco ayudo pa por pasa e temporada aki, pero tambe ta mira p’e trahado por haya entrada pa por cuida su famia.
