Mañan 10 di october ta dia di salud mental mundialmente y p’esey Fundacion Anti Droga Aruba (F.A.D.A.) ta duna importancia riba e dia importante aki. F.A.D.A y Respaldo a tene un conferencia di prensa y a bisa cu ta traha hunto pa trece informacion na comunidad.
A yega tempo cu e bida diario a cambia hopi debi na e pandemia COVID-19. Por mira cu e ultimo lunanan tabata tin retonan p’e fronliners, kendenan ta brinda servicio bou cualkier circunstancia y cu e medio di hiba COVID-19 pa nan cas. E situacion a trece reto p’e studiantenan cu mester a adapta cu nan les sea di haci esey online of na cas, pero tambe di tin poco contacto cu docente of amistadnan di scol. Tambe trahadonan ta preocupa pa nan trabou door di tin miedo di perd’e.
Cifranan ta halto di esnan cu ta sufri di tin menos entrada; personanan cu problema di salud mental ta experencia un isolacion pio di loke nan ta biba caba diariamente. No por lubida esnan cu ta sufri den silencio door di perdida di un ser keri y no por a bis’e ayo, pero no por haya consolacion di un familiar.
Rubiella Toppenberg, trahado preventivo di F.A.D.A, a bisa cu e uzo di droga y alcohol ta hopi halto, esey ta hiba na problema di salud mental. E fundacion ta puntra na famia si e abuso di alcohol of droga ta necesario, pa pensa riba e muchanan cu ta mira adultonan como ehempel. Dokter van Gaalen di Respaldo a splica un tiki mas riba problema di salud mental.
Door di experencia di pasado, ta premira cu den siguiente lunanan y aña e cifranan di salud mental lo aumenta. P’esey awo mas cu nunca mester para keto y mira e importancia di salud mental. Ta conseha pa no keda keto sino busca yudansa cerca profesionalnan. P’esey World Health Organization ta enfoca riba #mentalhealthforall.
