DVG: Polis lo para fiestanan planea e fin di siman aki

Crisis Team di Gobierno ta informa cu orario di cierre a bira 11:00 pm y Toque de Queda a bira 12or madruga pa 5or di mainta. Esey ta e unico cambio cu a bin cu ne pa loke ta medidanan.

E actividadnan planea manera algun aki bou menciona unda ta promociona musica, no ta permiti y lo actua riba esakinan segun e Afkondigingsblad van Aruba Ministeriële Regeling Calamiteitenverordening. Awenochi tin actividad na Sandbar cu DJ Cash, Southbeach bar cu DJ 101, diasabra anochi Sandbar cu D’licious Jerino Baas y henter fin di siman Lekker cu C-Zar Olarte, nada di esaki no por tuma luga.

Cambio di orario di Toque de Queda no ta nifica cu e peliger di contrae Covid-19 a pasa. Cambio di Toque de Queda ta nifica cu awo ta bay riba e bon caminda. E casonan ta bahando, pero mester sigui traha pa mantene asina. DVG ta conseha pa relaha y kita e stress di siman na un forma responsabel, tambe keda semper conciente cu e risico tey. Aplica tur medida di proteccion pa bo proteccion, di bo famia y di Aruba completo. Sigui cuida, Aruba ta conta cu bo!