Algun luna pasa, debi na tension pisa entre Gobierno Insular di Sint Eustatius y Hulanda, Ministerio di Asuntonan di Reino a opta pa forma un comision di hombernan sabi den Reino pa inventarisa e disputa y purba forma brug pa yega na solucion permanente. Den e comision aki ta sinta entre otro ex Gobernador di Aruba, Freddis Refunjol y Jan Franssen di Hulanda.
Algun siman pasa e duo a biaha pa Statia pero a topa cu contra tiempo pisa di parti di Gobierno di e isla. A nenga di sinta cu nan y mas ainda, a prohibi ambtenaarnan pa reuni of suministra informacion na e comision.
Esaki sinembargo no a frustra e mision, pasobra toch a logra delibera cu diferente grupo no gubernamental, manera organisacionnan politico y comercial. A constata cu enberdad tin un trayecto pa encamina pa drecha e relacion politico entre Den Haag y Oranjestad, cu ta capital di Sint Eustatius.
Den un di dos intento, e comision lo biaha atrobe entre 4 pa 7 di september pa e isla, buscando forma pa topa cu dirigentenan y purba compronde di nan kico ta locual ta obstaculisa e relacion entre Madre Patria y nan. Fin di September e comision lo mester raporta na Minister di Relacionnan di Reino di Hulanda.
Sint Eustatius, desde 10 di october 2010 ta un municipio di Hulanda, mescos cu Boneiro y Saba. Hunto nan ta forma e islanan BES. Statia, manera nan sa yame tambe, ta midi 21 km2 y den Censo di aña 2001 a conta 3543 habitante, mientras cu na aña 2015 a calcula e populacion na 3877 habitante. E nomber di e isla ta procedente di un Martir Cristian, conoci na Spaño como San Eustaquio y na Portugues como Santo Eustáquio of Santo Eustácio. Columbus a descubri’e na aña 1493.
