Tres luna ta den pasa pa gobierno tuma un decision si ta habri frontera completo cu Venezuela. Gobierno a extende e ceramento di frontera aereo entre Aruba y Venezuela. Te awo ta ricibi carga desde Venezuela via maritimo y tur cos ta bayendo bon. Pa cuminsa habri vuelo di carga y pasahero cu Venezuela, mester mira cu tur cos ta cana bon.
Minister presidente mr. Evelyn Wever-Croes a splica cu dia prome di mei a habri frontera maritimo cu Venezuela y a tarda mas o menos cuater siman p’e prome carga yega. Te cu awo gobierno ta satisfecho con e proceso ta bayendo. Tur hende ta tene nan mes na e palabracion y acuerdonan haci.
Aruba ta haya berdura y fruta. Tur producto cu por bin desde Venezuela ta yegando tur siman. Tin acceso n’e productonan ey. Algun fruteria a baha nan prijs considerablemente y p’esey e mandatario a gradici na tur cu a logra esey. Segun Wever-Croes, no ta tur comerciante por a baha nan prijs.
Frontera aereo cera ainda
Aruba a indica di no ta cla pa habri frontera aereo dia prome di mei. A prolonga esaki cu tres luna mas. E comision di grenssluiting Venezuela a duna e conseho ey. Segun e mandatario, nan ta trahando riba diferente aspecto pa por yega a un reapertura. Na momento cu e ta asina leu, gobierno lo anuncia esey.
E comision ta trahando riba un reapertura di aereo den prome fase. E prome fase ta completando carga. Nan ta mirando ki ta e miho manera p’esey por pasa. E ta kere cu dentro di poco por anuncia cu e frontera aereo pa carga por ta habri, bou ki condicion. Tur esey mester ta bon negosha cu autoridad Venezolano.
Di banda di autoridad Venezolano, segun Wever-Croes, nan a indica di ta dispuesto negosha y esey ta algo hopi bon. E mandatario ta kere cu si nan ta dispuesto, e ora por yega na algo.
Carga di Venezuela
Tin carga cu ta bin desde Venezuela, pero ta uza aerolinea cu no ta local manera DHL. E mandatario a splica cu e problema no ta si carga por bin of no. E problema ta cu e vuelonan directo entre Aruba y Venezuela no por.
Gobierno a haya informacion cu tin local cu kier haci vuelo via Corsou pa Venezuela y esey ta algo cu Directie Luchtvaart ta mirando pa toets na e aspectonan tecnico di kico flight plan, kico ta e plan di origen, unda e ta yega. Esaki ta un discusion tecnico y ta mirando si esey ta posibel. En caso cu esey no ta posibel, e avion mester traha un flight plan pa Aruba-Corsou, y un otro di Corsou-Venezuela, y asina ey pa cumpli cu e rekisitonan. Nan ta trahando riba e plan ey.
