Cu hopi asombro parlamentario Mike de Meza di partido AVP por a scucha, despues cu a haya diferente yamada cu a lesa e cos cu e prome minister a pone den medionan social. Ora cu el a les’e, despues a scuch’e, no por a kere su oreanan, caminda cu un prome minister di pais Aruba, ta trece insinuacionnan, ta specula, ta crea un storia, ta trece engaño pa su sed di rabia, contra e contrincantenan politico na Aruba.
Dañando nomber na Aruba. Ora cu ta papia malo, ta di bo pais bo ta papia malo. Bo no tin ningun base. Bo ta scucha storia, bo mes ta crea storia, pasobra esey ta su estilo. Por a mira esey den un aña y mey.
Den parlamento por a nota esey tambe, cu a ta crea storia pa un ambiente politico. E ta gewoon increibel pa scucha un prome minister un biaha mas ta bin cu insinuacionnan y e ta haci’e den un forma cu e sa cu ningun hende no por acus’e di nada, pasobra e ta bisa cu e ta spera cu otro gobernantenan of gobernantenan anterior, no ta hinca den e 180 miyon cu a disparce.
Prome cos bay verifica su berdad e placa ey a disparce. Laga haci e investigacion y si el a disparce, bay haya sa unda el a disparce, pasobra ningun gobernante, ni den e gobierno actual, tin acceso na ningun situacion of transaccion financiero di CITGO Aruba, CITGO Merca of cualkier otro luga.
Esey ta algo cu ta netamente den man di e companianan. Na fin di dia, ta un banda politicamente contento di scucha pa pueblo tambe por scucha e locura cu un prome minister ta trece dilanti y den futuro ta spera hopi cercano, un bes mas por prueba con e señora aki cu ta prome minister di Aruba, ta gaña tras di otro, ta crea storia, gaña pueblo cu tur sorto di cos absurdo.
Locual AVP a haci ora cu a drenta den gobierno ta deal cu un desaster cu gabinete Oduber a laga atras, caminda cu e refineria no tabata den operacion, caminda e tempo ey Valero a laga sa cu nan no por traha cu e gobierno cu tabata existi e tempo ey y tabata haci tanto cambio cu tabata trece instabilidad den e inversionnan cu nan tabata pa bay haci, y a tuma e decision pa bandona Aruba.
AVP a drenta gobierno na November 2009, haya un situacion di un crisis financiero economico mundial. Riba dje, un refineria cu no tabata den operacion mas cu ta bay cera definitivamente y un situacion di un desmoralidad den Aruba su gobierno, hunto cu su gremionan. Tur tabata den conflicto cu otro, tur partner strategico di Aruba, kier a bandona e tempo ey.
Segun de Meza, ta e situacion cu nan a hereda e tempo ey, caminda cu KLM a bandona, caminda cu Carnival Cruise Line a bandona, American Airlines tabata tin pensa di bandona. Esey ta loke nan a haya, un desaster financiero, un desaster infrastructural, enfin.
Poder di compra tabata haltisimo. Mester a drecha e situacion eynan. Na e momento ey, a acerca diferente gobierno rond di mundo, diferente companianan estatal, a bay tur caminda. Te papia cu PetroChina mes, pero cu Hulanda, cu Africa, cu Arabia, cu Merca, cu Sur America, a bay Trinidad, Mexico, Colombia, Brazil, tur di nan, segun de Meza, pa drecha e situacion cu Evelyn su grupo a laga atras na 2009. AVP a traha duro y diligentemente, a yega na una cuerdo cu Valero. Nan a rehabilita e operacion na fin di 2010 na cuminsamento na 2011. Lastimamente na 2012 e diferencia den producto cu crudo a cambia asina tanto, cu hopi refineria rond mundo a cera nan portanan.
Pero tambe mester a drecha relacionnan cu partnernan strategico en general, pa purba di wanta e economia.
Un cos cu a cusa cu Valero ta cu no tabata competitivo mas pa e refineria di Aruba, pasobra for di 2007, nan a alerta gobierno di MEP e tempo ey, Gabinete Oduber IV, cu si no por sinta na mesa, yega na una cuerdo riba e partinan di impuesto, yega na e belasting regime cu a bin cun’e di BBO cu su efectonan grandi pa loke ta e industria den e refineria, e ora ey nan no ta bay inverti mas y door di no inverti, e planta ta bay bira obsoleto, e ora nan no por keda opera competitivamente riba e mercado.
E tempo ey e gobierno no kier a kere. E prome minister e tempo ey a laga sa cu nan por desmantela e refineria, pone riba nan lomba y disparce for di Aruba. Ta tipo di expresionnan cu tabata tin e tempo ey. Na fin di dia por mira cu Valero a cera su porta. Mester a deal cu esey. AVP a sinta cu e diferente companianan. Via contactonan, a haya cu por a yega cerca di e gerencia di CITGO y di inmediato a cuminsa papia cu nan tocante e business model cu Aruba por ofrece pa procesa e crudo pisa di Venezuela. Y e negociacionnan a tuma luga. A yega na 2016 cu a yega na un acuerdo. A sinta cu gobernantenan Hulandes pa papia di dje, caminda cu a haya nan bendicion. Tur cos tabata tey. Expertonan a yuda den esaki, nos mes yiunan di tera y tambe for di Hulanda, di Merca, di region, a yuda den esaki pa yega na un acuerdo.
Ora cu a sali for di gobierno na 2017, tabata tin mas cu 600 hende, tata y mamanan di famia, tabata traha den e refineria.
