Miembro di fraccion di AVP den Parlamento, drs. Mervin Wyatt-Ras tabata den bijeenkomst no. 19 cu e tema “Toelichting door de MinAZ op voorstel van rijkswet Caribisch Orgaan Hervorming en Ontwikkeling (COHO) en advies Raad van State terzake”. Durante e encuentro aki e ex-minister presidente a bin duna informacion encuanto e organo Caribense pa Reformacion y Desaroyo.
Evelyn Wever-Croes pa motibonan oportunista a bay gobernador pa entrega su responsabilidad pa pais Aruba, pa e no para responsabel pa loke el a firma y entrega nos autonomia. El a uza e asunto di e Fundacion di POR so como excusa pa benta gobierno abou. Pero un ta e mes ta traha cu esnan cu e mes a yama pa corupto?
Desde inicio e gobierno aki no a traha manera mester ta. No a haci mucho pa pais Aruba. No a drecha ningun scol. No a mehora infrastructura. No a drecha ningun cas di FCCA. No a baha prijs di comestibles. No a baha prijs di awa y coriente. No a baha edad di pensioen manera a priminti. No a crea mas espacio den cartera di nos ciudadanonan. A pone maestronan den stress door di cambionan descabeya sin consulta.
A corta den cuido cu 5 miyon pa aña y a entrega Aruba su autonomia na Hulanda, a cambio di un paar di luna di placa. Evelyn a bay di acuerdo pa pasa 2 Rijkswet, esta COHO y Rijkswet Aruba financieel toezicht (RAft) y e acuerdo cu el a firma pa castiga nos pueblo cu medida den Landspaket.
Pero ta hopi obvio cu Evelyn-Wever Croes manera semper ora cusina bira cayente e ta core bay. Paso a sali na cla cu e tabata na altura di e conseho devastador di Raad van State pa loke ta trata e Rijkswet COHO.
Secretario di Estado Knops a declara cu a delibera cu e islanan tocante e conseho aki di basta tempo caba. Pues Wever-Croes tabata sa pero a keda keto. El a gaña pueblo. Esaki ta obvio awor.
Wever-Croes a anuncia campaña tres luna pasa, a bin cu logo nobo den pleno pandemia y ora cu el a ripara cu e no por a drenta cas di ciudadanonan pa campaña, paso nan ta core cu ne, el a warda pa haya un excuus pa por disolve e gobierno. Aki e ta mustra su incapacidad y esun di su gobierno pa traha hunto. Aki ta keda demostra cu interes personal ta mas importante p’e cu esun di nos pueblo.
Wyatt-Ras durante e reunion a puntra pa haya splicacion di e conseho di Raad van State riba COHO y dicon Wever-Croes a keda den silencio tocante e conseho.
Tambe a cuestiona e hecho cu COHO lo investiga personal den servicio di gobierno. Wyatt-Ras a cuestiona ademas cu un cantidad di empleadonan te ainda no ta haya FASE, locual a cay den mal tera cerca di e minister.
Tambe el a cuestiona e agilisacion di ontslagprocedure pa facilita cu por kita trahadonan fo’i trabou mas facil y el a haci pregunta encuanto e reforma fiscal. Ta lastima cu e exgobierno disfuncional no por a keda profesional ora di contesta pregunta. Igualmente cu Ady Thijsen cu te ainda no a compronde cu e mester ta neutral den su trabou y no tuma parti pa gobierno.
Ta keda un hecho cu a disolve gobierno prome cu nan por a entrega e presupuesto na Parlamento. Esaki despues di 7 luna cu mester a entreta presupuesto segun nos Constitucion.
Awor ta gaña cu ta para pa integridad mientras tur hende sa cu pa motibo di otro argumentonan a disolve e gobierno. AVP si lo rescata nos pueblo. Den dialogo cu pueblo lo renegosha cu Hulanda y trece prosperidad bek den tur hogar.
