Manolo Giel ta forma parti di Pensionadonan Uni y el a sa di reuni cu prome minister riba e hecho cu pensionadonan cu a baha cu pensioen dia 1 di Januari 2015, no ta haya bashipremie y gelijkbedrag.
A trece padilanti e inhusticia y trato desigual cu a ser cometi contra un grupo di mas of menos 60 persona cu a baha cu pensioen desde e fecha ya menciona, caminda den un forma descriminatorio, a kita malamente e bashipremie y gelijkbedrag for di e grupo aki.
No mester lubida cu e grupo aki, mescos cu tur e otronan cu a baha cu pensioen prome cu dia 1 di Januari 2015, den pasado tambe a contribui grandemente ora di entrega un parti di nan salario, pasando den situacion financiero di gobierno.
Manera cu por corda, den pasado, varios inhusticia social y actonan descriminatorio a ser cometi contra e cuerpo di empleadonan publico, pa cual hopi lucha a ser hiba pa caba cu e inhusticia aki.
E puntonan aki a trece padilanti na prome minister, Evelyn Wever-Croes. A menciona e inhusticianan, caminda cu e ser femenino mester a kita for di trabao manera cu nan drenta enlace matrimonial. Awe, esaki no ta asina mas ya cu e ser femenino ta keda cu su trabao ora cu e casa.
Un otro ehempel ta, e pago di salario entre hende homber y hende muhe y di esnan soltero y esnan casa, tambe tabata desigual y ta pesey un lucha fuerte a ser hiba pa logra e famoso pago igual pa trabao igual. Esey a sosode na cuminsamento di añanan 90.
Tambe e status pa werkster y arbeiders, tur a bira ambtenaar, y asina tambe a caba cu e desigualdad cu tabata tin den e grupo aki.
Awe, e grupo di pensionado, cu mester a bida den tur trankilidad y gosa di un pensioen bon mereci, ya cu nan a traha pa añanan largo pa esaki, mester bolbe hiba un lucha pa recobra un derecho cu a ser kita malamento for di nan.
Esey ta e bashipremie y gelijkbedrag cu a perde desde 1 di Januari 2015.
Hecho ta cu na principio di igualdad, a ser trapa na man cu pia y awe por papia cu den e pais aki, nos conoce dos tipo di pensionado. Esta e pensionadonan plus, cu a bay cu pensioen prome cu 1 di Januari 2015 y esnan cu a baha cu pensioen despues di 1 di Januari 2015. Nan ta wordo trata como pensionadonan di segunda categoria.
Den un reunion prome minister, el a mustra su comprension total pa e lucha pa e bashipremie y gelijkbedrag y ta di acuerdo cu e trato aki ta descriminatorio.
E lo bay haci tur su esfuerso pa logra concretisa e sumanan necesario y asina cumpli cu e deseo di e pensionadonan y esaki basa riba un mocion di parlamento.
