Crisis-Team ta informa cu entrante awe, 8 october, ta kita algun pais for di lista pa paisnan cu risico halto pa COVID-19. E dos pais ta Brasil y Hulanda. Esaki ta encera cu desde e fecha aki, e residentenan di Aruba cu ta vacuna completo por biaha bin bek for di Hulanda of Brasil cu nan certificado di vacuna. Nan pues no tin mester haci un PCR test pa por drenta Aruba. E certificado di vacuna mester ta uno emiti door di DVG y e biahero mester warda 14 dia despues di e ultimo prik pa e por biaha bin bek Aruba. Turista biahando pa Aruba for di e paisnan aki por drenta sin tin cu hasi un PCR test. E turista lo mester ‘upload’ su EU Digital Corona Certificate (DCC) den version di PDF riba e plataforma di ED online. DVG lo revisa e certificado y si esaki keda aproba, e turista lo por biaha libremente pa Aruba.
