Diasabra atardi a tuma luga e Encuentro Multicultural 2022 organisa pa Departamento di Cultura Aruba bou auspicio di Ministerio di Cultura. TREMPAN a combersa cu Stanley Dabian, relacionista publico di e entidad kende a splica cu e evento a cana di un manera hopi colorido y bunita y nan ta contento di por a haci den persona bek, despues cu aña pasa e pandemia a obliga pa hacie virtual. Tambe a haya un bon acogida cu participacion di 17 pais y un sala di Cas di Cultura yen.
E evento a cuminsa cu un desfile cu a bin for di caya y drenta cura y scenario for di parti patras di Cas di Cultura. Minister di Cultura, Xiomara Maduro a hiba palabra, mescos cu president di Fundacion Lanta Papiamento, Edward Pieters. E fundacion a uni na e celebracion mirando cu, ademas cu 21 di mei ta Dia Mundial di Diversidad Cultural, di Dialogo y Desaroyo, tambe ta e fecha den cual bek na 2003 a oficialisa Papiamento como idioma di Aruba. Idioma ta un di e vehiculonan mas importante den cultura y nos mester duna respet y reconocemento.
Departamento di Cultura Aruba ta gradici tur grupo cu a participa, na Cuerpo Consular cu a presencia y presenta y ta parti di e evento aki. E ta un evento cu hopi aña caba ta hacie, pero prome tabata den format di un feria cultural caminda tabatin feria gastronomico, artesanal y presentacionnan cultural. Dabian a sigura cu despues di pandemia e evento ta bek y cu mas forsa. Ya caba tin plannan riba mesa pa den 2023 haci e celebracion aki dura un siman largo.
Tin interes di parti di consuladonan na Aruba comparti nan folklore, ademas di nan gastronomia y hopi mas.
