Durante 2017 Camara di Comercio y Industria di Aruba (KvK) a colecta y analisa datos pa haya un bista encuanto e motibonan cu un comerciante tin pa tuma e decision pa cera su negoshi pa publico.
Esaki ta prome biaha cu KvK ta tene un encuesta pa haya e informacion di pakico negoshinan ta cera nan porta. A pidi e comerciantenan cu a bin oficina di KvK pa cancela nan registracion pa discretamente comparti e informacion aki cu KvK.
Durante 2017 a registra un total di 1350 negoshinan nobo y di otro banda un total di 715 negoshi cu pa un of otro motibo a yena e formulario pa cancela nan registracion na KvK. Cancelacion ta wordo registra ora un negoshi wordo anula of wordo likida door di e doño of proprietario. Di e total for di e sistema di registracion 76 ta negoshinan offshore y 639 ta negoshinan onshore pues cu localidad na Aruba mes. Nos tin di e grupo 105 NV, 502 Eenmanszaak, 18 VBA, 73 AVV y di otro tipo un total di 17.
Ta importante pa indica cu e informacion cu KvK tin ta duna un bista di negoshinan cu no ta activo mas aunke cu esaki no ta cuadra den su totalidad cu e situacion real. E motibo pa esaki ta cu tin negoshi cu no ta bin KvK pa informa pa kita registracion for di registro di KvK y e negoshi ta keda registra como activo.
KvK ta manda continuamente recordatorio na e empresario pa tene cuenta y cumpli cu esaki. Cancelacion di registracion riba su mes ta gratis. Pero si no bin haci esaki e ora KvK lo keda cu e derecho indefini pa sigui cobra e contribucion di existencia di e negoshi. Alabes e comerciante ta sigui haya Departamento di Impuesto ta manda cobra3002 nza pa cumpli cu impuestonan di un negoshi. E resultado di e estudio aki a indica cu un total di 30% di tur e negoshinan a cancela durante 2017 ta pa falta di actividadnan comercial a conduci pa un negoshi wordo termina.
Asina por pensa mal maneho di un negoshi y su mercadeo, producto of servicio cu no ta na interes di e consumidor, of prijsnan menos atractivo entre otro. 18% di negoshi cu a termina ta pa motibo di cambio di entidad legal. Hopi negoshi ta cuminsa como un Eenmanszaak pa motibo cu nan kier wak con e negoshi ta bay y/of tambe pasobra pa formalisa un entidad manera un N.V. ta dura hopi cerca un notario. Pa cambia di entidad legal un negoshi tin cu cancela esun anterior pa asina habri bou un entidad nobo. Mayoria di e negoshinan aki a wordo comberti den un VBA pa motibo di e beneficionan y flexibilidad cu un VBA ta brinda riba un Eenmanszaak of un NV. E popularidad di VBA ta bin door cu bo por lanta un VBA bo so sin ningun tipo di partnership, pero bo mester ta residencia na Aruba. E ta mas flexibel den su structura di maneho. Bo no ta wordo rekiri di un suma minimo di capital, bo ta liber pa scohe idioma pa e decreto, sea den Papiamento, Hulandes of Ingles. Un notario civil ta rekeri pa registra e VBA pero cambionan den su constitucion no necesariamente mester bay via un notario.16% di comerciantenan a indica cu nan ta haya nan mes cu gastonan halto pa por mantene nan negoshi activo – y 13% a indica cu pa falta di financiamento nan tin cu descontinua nan negoshi.
Esaki ta indica cu hunto e motibo di gasto halto pa haci negoshi y escasez di fondo ta acumula na 29% di e negoshinan cu a wordo registra pa cancela cerca KvK. Otro motibonan cu a resalta ta entre otro competencia fuerte riba mercado (9%), motibonan di salud (6%), permiso pa maneha negoshi (3%), haya trabou fiho/estudio (2%), y no tin tempo pa dedica na e negoshi (1%). KvK semper ta ofrece ayudo na e comerciante por medio di su cursonan y diferente evento comercial pa yuda stimula e empresario pa maneha su negoshi exitosamente. Banda di esaki un di e retonan mas importante pa KvK ta elimina e red tape pa empresarionan por lanta un negoshi. KvK lo continua na examina e informacion di e estudio y lo sigui brinda solucion pa contribui na e duracion di negoshinan local. Pa cualkier pregunta y/of mas informacion, por tuma contacto cu KvK via e-mail na [email protected] of via telefoon 582-1120.
