Arthur Dowers di AVP a splica cu e gobierno awor ta uno di papia un cos y haci otro. Segun Dowers ainda por corda con un banco, den e caso aki CMB, a duna cuerpo policial un cantidad di placa cu nan por a parti placa riba caya, na luga di parti boet. E tempo ey, esaki a trece hopi alegria cerca cierto hendenan den comunidad. Dowers no a mete pasobra e como minister no lo bay parti placa di un compania priva. Sinembargo Evelyn Wever-Croes den parlamento, den tempo di pasco a bira pio cu diabel a cuminsa haci grito contra dje pa parti placa di pueblo y ki autoridad e tin pa parti esey segun Dowers. Ora cu a bin resulta cu ta placa di banco y a mira hopi like riba Facebook, Evelyn a core bay sconde, subi avion y bay shop y no a bisa nada mas riba e tema. Por mira un hende amarga cu simplemente no kier mira nada bin na fabor di pueblo na momento cu e no bisa cu e a haci’e. E placa cu awe gobierno ta regala ta placa di pueblo. E placa aki ta di NV di Gobierno y mester keda liber pa wordo reparti fuera di e wega politico segun Arthur Dowers. Un minister no por bay parti placa zomaar di pueblo. E unico caminda cu por parti placa den bo presupuesto, ta den bo departamentonan. Pero si ta sali for di presupuesto bay un fundacion, e ministernan aki tin cu bin staten pidi permiso pa parti placa di pueblo. Pa pone esaki den contexto completo, cu e wega politico cu nan ta hunga riba sentimento di pueblo, ta mustra cu ta tuma pueblo haci. Aunke nan ta conciente cu ta tuma hende haci. E mesun grupo cu a papia ocho aña di cera Otmar Oduber, a haci diferente denuncia, a yame pa tur sorto di ladron. Awor hunto cu Otmar Oduber ta persigui hende, e plan diabolico cu nan tin.
E “family” ta central
Den campaña a bisa cu lo bin cu 7 minister pa reduci miyones di florin pa pueblo. Kico nos ta mira? Nan a bin cu ocho minister. A camufla uno yam’e Staats Secretaris. A pone primo prima, tur ta den bestuurskantoor, ta cobrando riba custia di pueblo. Cos cu nan tabata keha continuamente riba dje.
Mesun cos a papia di no por come klinkers, por a mira cu na final di aña, a coy 6 miyon florin cu por reduci debe di pais Aruba, hink’e den bloki y a bay grita cu mester pasa. Por a mira awe cu no tin ningun renobacion tumando luga. Tur cos cu nan lo por haci cu e placa ey na reduccion di debe, por a uza esaki e aña aki, mirando cu no tin ningunp royecto den ehecucion. Prome paso cu nan a tuma ta piedra, santo y bloki, alomenos cu nan lo traha caretera di glas y caretera di yerba, pasobra no ta mira otro opcion ora cu bay gaba cu b’a traha un afslag, a basha grijs y pone full un fiesta pasobra a haci algo como minister. No por a mira ningun hende central, sino grijs central. Na Bestuurskantoor, a mira piedra y bloki y friends & family central. Aki por mira un grupo di hende cu a gaña pueblo, cu a priminti cierto cosnan, awor aki atrobe, nan prome salida nan no por a cumpli cun’e. No por spera mucho di e grupo aki, pero lo ta vigilante. Por a mira cu nan ta instrui un grupo pa gaña na nan nomber y AVP lo ta vigila e grupo aki y denuncia di nobo cu e mentiranan cu wordo treci padilanti. Un di e mentiranan cu a bin padilanti den e ultimo dianan aki, ta riba cu nan a retira. Ta bon pa accentua cu loke e hendenan aki a bisa y sa, pasobra e ta un mentira flagrante, cu pasobra tin cierto hendenan cu tabata hende di confiansa den e gobierno anterior, pesey e hendenan aki no mag traha na ningun departamento di gobierno. Ta un di e nonsensenan cu a tende te na e momentonan aki.
MEP tambe a nombra hende
Por ehempel tin hende ta bari of ta mop den bestuurskantoor y a trece for di e departamento di cultura, e persona aki no por bay den e departamento di cultura, pasobra el a mop den bestuurskantoor.
