Ta for di hopi tempo caba cu ta reina e situacion di entregament’i salario. Ta na momento cu Coronavirus a introduci su mes como e enemigo mas grandi di mundo na Aruba. Tabata na maart 2020 ora cu pocopoco nos economia a cuminsa crash den otro. Cah’i gobierno a bira mas bashi di locual e tabata ta caba, mas di trinta mil hende sin trabou y dependiendo sea di FASE of subsidio di salario.
Ta corda con gobierno a cuminsa cu cortament’i salario di parlamentario -y ministernan. Empleado publico tambe mester a entrega como muestra di solidaridad. E cifra di 12.6% ta loke e empleadonan publico no a gusta, pero a haya nan mes obliga di entrega. No mucho tempo despues a cuminsa un incertidumbre riba ken si tabata entrega realmente of no, ta corda con sindicato SIWA na WEB tabata contra pa sigui entrega. Arubus N.V. ta un di e companianan estatal cu mas ta sangra, un di e companianan cu no por ni saca fondo pa paga payroll.
Durante un encuentro na SEPPA empledonan a vocifera nan preocupacion mirando cu gerencia a pone riba mesa dos opcion. Esaki no a cay den bon tera cerca e empleadonan, ta trata di 12.6% cu kier obliga nan pa entrega. E empleadonan kier mas opcion di cual nan por scoge. Diaranson awo SEPPA lo ta na mesa cu mediado di gobierno y gerencia di Arubus N.V. pa mira con por yega na un solucion cu tur partido ta keda contento cu ne.
