Artistanan local semper como invitadonan special na 24ora.com pa asina comparti y presenta nan produccionnan di mas nobo. Den forma di exclusividad e grupo Indirect a lansa nan cancion di mas nobo riba mercado cu ta hiba e nomber “Famia”.
Den entrevista cu Glembert Bislip “ Indi Gem” a conta un poco con a yega na e idea di e cancion aki. Den un temporada hopi dificil pa hopi hende riba nos isla pero tambe den experiencia propio, ta yega na letra y mensahe di positivismo cu nos comunidad tin mester di dje. Un cancion cu ta papia di respet na mayornan, na hobennan cu ta escohe caminda robes y cu esaki kier trece un mensahe pa motiva nan pa cambia.
Despues di e exito mas recien na final di aña 2020, Indirect a sigui traha di biaha pa asina habri cu produccionan nobo. Den colaboracion cu artista Jafrine Briezen “Red Machine” (actualmente na Hulanda), e cancion practicamente tabata cla. Prome intento di grabacion no a resulta pa motibo di awacero, pero no a tarda mucho cu a continua filmacion pa yega na e producto final.
Un Reggae positivo canta pa Indi Gem, Indi Fay y Red Machine
Micheal Peña “Indi Fay” tambe tabata den entrevista cu nos. A mira un produccion sumamente na nivel y realisa na nan agrado. Den su opinion, miho di locual nan mes a spera cu e lo a bay keda. Cu promocion y paisahe bunita di nos isla. Mensahenan positivo pa yuda e pueblo ta mas conciente. Micheal ta remarca cu “Tin cu pensa prome cu haci” pa evita decisionnan cu despues lo lamenta.
Proximamente lo tin produccionnan den estilo mas reggeaton, cu mas movimiento. Lastimamente pa motibo di e pandemia te ainda no por planifica presentacionnan “live” pa demostra na e publico e energia cu nan a bin cu ne, pero un cos ta sigur “Indirect tey bek” ta locual cu Micheal a laga sa.
No por keda sin gradici esnan cu a forma parti di e produccion aki, manera Oslin Geerman (Insane) pa e trabou di editing, Jefferson Wouters pa e trabou di filmacion y sin lubida e aporte personal di cada miembro di Indirect cu a pone e toke di nan gusto aden.
Intencion den e lunanan dilanti, ta di bin cu mas produccion positivo cu estilo Gospel pa asina trece un poco mas e canto dedica na Dios. Tambe ta bay graba cu artistanan local conoci den farandula, pero tambe talentonan nobo pa asina duna empuhe na esnan cu ta cuminsando.
Un mensahe na e hubentud ta cu “Caya no ta paga” lo ideal ta pa busca caminda di Dios y sea positivo den bida. Di parti Micheal, pa ta alegre tur dia, loke pasa a pasa, sigui cu e bida pa bay dilanti pasobra ta un bida nos tin y mester disfruta di dje.
