Fundacion Lotto pa Deporte ta satisfecho cu apertura di Baseball Little League 2018, pa motibo cu e fundacion t’ey pa yuda y sostene deporte. Lotto ta contento di mira hopi pelotero hoben cu ta ricibi e sosten di nan mayornan y como ex hungado di baseball, Elias Kock, representante di Lotto pa Deporte, ta sostene e deporte. Meta di e fundacion ta pa crea mas atleta, mas deportista na Aruba y p’esey e facilidadnan deportivo ta na disposicion di cualkier atleta.
Deporte ta un parti grandi di formacion, pasobra e ta haci personanan bira un lider den comunidad. Elias Kock ta kere cu ora ta haci deporte, ta haci patria. Tin aña baseball tin hopi mucha y otro biaha menos y pa Kock ta mustra cu e biaha aki e teamnan tin menos mucha. Pero asina mes el a ricibi comentarionan positivo di e deporte aki. Tambe por mira cu tin hopi hende envolvi den baseball.
Tin persona ta expresa cu Lotto no ta sostene un atleta, pero Kock a splica cu Lotto no ta sostene teamnan separadamente. E fundacion ta sostene e federacion cual ta nan meta hunto cu Stichting Subsidie Commissie.
Kock ta orguyoso di tende cu un hoben di Aruba ta haci nan esfuerso pa yega leu den baseball. Aworaki un role model den baseball tin y esaki ta Xander Bogaerts, kende ta haciendo un tremendo trabou na Boston, asina el a expresa. Kock ta kere cu hopi pelotero hoben lo por sigui Bogaerts su pasonan. Tin hopi mucha ta hungando baseball y ta mira algun prospecto.
