Diahuebs caba tabata tin e ultimo detayenan pa e preparacion di e 15 candidatanan pa reina di scol di Aruba. Segun Endy Croes, comision Reina di Scol Aruba, tabata tin e parti caminda cu nan por a bin train nan show den Club Caiquetio.
Door cu ta trata di un grupo grandi, mita grupo a haci’e diahuebs, y awe diabierna e siguiente grupo haci’e, pa asina diasabra mainta 10’or, tin e eleccion cu tur e 15 participantenan cu ta un total di 13 scol cu ta participando na Reina di Scol.
Categoria
Croes a sigui splica cu tin cuater categoria unda cu lo scoge e reinanan. Tin categoria infantil, unda cu tin cinco scol participando.
Pa e categoria pre-teen tin 4 scol participante. Pa hubenil tin 3 scol y pa reina grandi tambe tin 3 scol participando.
Kico por spera
Loke ta haci e eleccion aki apart di tur e otro eleccionnan di carnaval, cu tin algun regla stipula pa e candidatanan tene nan mes na dje. E reglanan aki ta pa asina garantisa cu tur reina participando ta riba e mesun nivel. Aki no tin e aspecto di luho, e aspecto di extra preparacion cu den un eleccion na stadion tin mas influencia. Aki cada scol, cada reina, na momento di apertura, nan mester haci na presentacion den nan uniform di scol. No mag di decora e uniform. Ora cu ta bay haci presentacion di speech, mester tin e mesun uniform aki bisti, sin decoracion, pero e ora cu un headpiece creativo.
Aki no mag di uza stenchi ni pluma. Ta e momento aki ta pa pusha esnan cu mentenan creativo pa ta un tiki mas creativo pa mira kico nan lo trece p’adilanti den e aspecto di costuum, cu ta bira e ora e headpiece creativo. Pa loke ta show, tur e reinanan infantil, pre-teen y hubenil mester bisti un shimis cortico. E shimis no mag di ta largo ni mag di tin stenchi. Pa esnan di reina grandi por bisti un shimis largo, pero e mesun aspecto cu no mag di tin stenchi riba dje.
Nan cada un mag di tin bailado te cu 6 persona cu por compañanan riba escenario. Bailadonan mester tin nan uniform bisti. No mag dorna uniform di scol. Loke si nan mag haci ta trata props. Akinan unda cu nan lo bay beeld uit e tema cu nan kier trece p’adilanti, nan tin e espacio pa haci esaki.
E shownan ta entre 6 y 8 minuut. No mag di pasa 8 minuut. Ta e aspecto di creatividad lo bay explota riba escenario diasabra mainta.
Invitacion
Tur carchi ta disponibel cerca tur candidata. E ta na balor di 15 florin di cual e candidata tin cu entrega comision 12.50. Cada ticket cu e candidata bende, e ta haya 2.50 cu e por uza pa cubri su gastonan. Esey ta e forma cu e comision kier traha pa yuda e candidata tambe pa cover su gastonan pa su participacion.
E ticketnan ta disponibel cerca tur e candidatanan. Si en caso tin ticket ainda, pero tur cos ta mustrando cu e evento aki lo bay ta sold-out pa diabierna mes. Si no ta asina, diasabra mainta tin chens pa cumpra ticket na porta, na balor di 15 florin.
Tambe e evento aki Reina di Scol Aruba no ta posibel sin e ayudo y sosten di tur sponsor y tur e boluntarionan cu lo bay traha diasabra mainta. Ta un grupo di rond di 20 pa 25 persona cu lo bay yuda boluntariamente trahando riba e proyecto pa e hubentud escolar.
Na e sponsornan cu tin e confiansa den e comision pa organisa e eleccion aki un danki. E comision tin un espacio special pa gradici nan pa tur e esfuerso cu nan tambe ta haci.
