Home » Eleccion di Prins y Pancho di Carnaval 73 tabata un tremendo exito

Eleccion di Prins y Pancho di Carnaval 73 tabata un tremendo exito

by Lis

E alegria y emocion tabata evidente entre e ganadonan di e diferente categorianan di Prins y Pancho di Carnaval 73. Pa e participantenan, chikito te grandi, tabata importante pa por a trece alegria, pero tambe pone e publico, e hurado hari cu nan jokenan.

Despues di un preparacion intenso y hopi sacrificio, David Garcia y Giorgi Tromp a logra trece e corona di Prins y Pancho Grandi pa Centro di Bario Noord, mientras cu Gerald Sarda y Haime Geerman a celebra nan victoria pa Baha Bo.

Pa Giorgi Tromp, e victoria tin un balor special, pasobra ta prome biaha cu Centro di Bario Noord logra e corona aki. E logro ta coincidi tambe cu e celebracion di 60 aña di e parada di mucha di e centro di bario. Tromp a expresa su alegria di por comparti e victoria cu David Garcia y a considera e logro como un momento historico pa nan grupo. Ademas, e participacion di Dushi Carnival Group a agrega un sabor special na e victoria.

David Garcia tambe a expresa su gradicimento pa tur e apoyo cu nan a ricibi durante e preparacion y presentacion. El a indica cu nan a traha duro y a haci hopi sacrificio pa por trece e corona cas.

E dos ganadonan a reconoce specialmente e trabou di nan coach, Endrick van der Biezen, y Gino. Segun nan, e preparacion no tabata facil, pero e pasenshi y perseverancia di e coachnan a hunga un papel importante den nan exito.

Baha Bo a celebra victoria

Prins Ey Baha y Pancho Bo Stem, Haime Geerman y Gerald Sarda tambe no por a sconde nan emocion despues di conoce e resultado.

Sarda a expresa su contento y a tuma e oportunidad pa gradici nan coach Tyson, kende a acompaña nan durante e proceso. Ademas, e dos ganadonan a gradici TOB pa habri nan brasa pa nan, y a reconoce e apoyo di Gerard y di nan sponsor Setty.

Categoria infantil tambe tin su ganado

Den categoria Infantil, Aiden Wever y Liam Paesch a expresa nan sorpresa y alegria cu nan a gana. Durante e entrevista, e dos mucha a bisa cu nan mes no tabata sa ainda cu nan a logra e victoria.

Nan a gradici Endrick van der Biezen y Bencho van der Biezen pa e preparacion y guia.

Dushi Carnival Group a celebra cu Filomena College Mavo

Zayron Geerman y Jaydrick Panneflek, representando Dushi Carnival Group y Filomena College Mavo, tambe a celebra nan victoria.

E dos participante a conta cu e preparacion tabata bon, aunke tabatin hopi stress durante e proceso. Finalmente, tur e trabou a duna resultado y nan por a celebra cu e corona riba nan cabes.

Nan a expresa gradicimento na Endrick van der Biezen, Benzeman van der Biezen y Filomena College Mavo pa e oportunidad pa representa e scol, ademas di Dushi Carnival Group. Nan a gradici tambe nan mayornan y coach pa e apoyo durante e preparacion.

E diferente ganadonan a comparti un mesun sentimento: hopi emocion, gradicimento y orguyo despues di un proceso cu a exigi dedicacion, pasenshi y trabou duro.

Bo por gusta tambe

Adblock Detected

Please support us by disabling your AdBlocker extension from your browsers for our website.